Rata a te Tino aratai

E au mau hoa Ite no Iehova e:

E nunaa fanaˈo mau â tatou e amo nei i te iˈoa o te Arii o te ao taatoa ra o Iehova! E iˈoa mure ore, tahuti ore, e te faaau ore to te Atua. Na ˈna i mairi ia tatou i to ˈna iˈoa, e mai te matahiti 1931 mai iho â râ i parauhia ˈi tatou ma tera iˈoa otahi. (Isa. 43:10) Te oaoa roa nei tatou i te parau e e Ite no Iehova tatou.

Te tamata nei te Diabolo i te faaino i te iˈoa o te Atua ma te tuutuu ore. Te vahavaha ra te mau nunaa ta ˈna e faatere ra i te iˈoa o Iehova. Mea riri roa na Babulonia Rahi, te hau emepera o te ao atoa o te haapaoraa hape, i te iˈoa o te Atua e ua tatara roa i te reira i roto e rave rahi Bibilia. Area Iesu ra, ua faateitei ïa i te iˈoa o to ˈna Metua, ma te faahiti na mua roa i te reira i roto i te hohoˈa pure ta ˈna i haapii i ta ˈna mau pǐpǐ. Ua parau oia: “E na ô outou ia pure: E to matou Metua i te ao r[a], ia raa to oe iˈoa.” (Mat. 6:9) I muri aˈe, i to ˈna pureraa i to ˈna Metua ma to ˈna aau atoa, ua na ô oia: “Ua faaite atu vau i to iˈoa i te mau taata o teie nei ao ta oe i ho mai no ˈu.” (Ioa. 17:6) Ia au i te hiˈoraa maitai roa o Iesu, ua faaoti papu atu â tatou e faaite i te iˈoa o Iehova ma te itoito e ati aˈe te fenua.

Ua turai te irava matahiti 2009, ‘A faaite hua ˈtu i te evanelia,’ ia tatou ia rave maite i ta tatou taviniraa. (Ohi. 20:24) Mea papu e ua haamaitai rahi Iehova i ta tatou mau tutavaraa i teie matahiti taviniraa i mairi. E faaiteraa rahi mau tei horoahia ei faahanahanaraa i te iˈoa o Iehova. E 7 313 173 taata poro tei amui i to ratou reo no te poro i te taata atoa e no te haapii i te feia aau haavare ore o te imi ra i te ravea o te fifi e rave rahi ta ratou e faaruru nei i te mau mahana atoa. Ia hiˈohia na 18 168 323 taata tei tae i te Oroa haamanaˈoraa i te poheraa o te Mesia, e mirioni taata hau te tiaoro â i te iˈoa o Iehova hou te hopea o teie nei ao ino.

A faatia noa ˈi Iehova, e tamau tatou i te poro i te evanelia o te Basileia ma te itoito rahi, a faaohipa ˈi i te mau ravea atoa no te farerei i te taata o ta tatou mau tuhaa fenua. (Mat. 24:14; Mar. 13:10) Na te mau fare e aroâ anei, na roto i te rata e te niuniu paraparau, aore ra ma te faanaho-ore-hia, ia faaitoito ïa tatou i te faaite i te iˈoa o Iehova e ta ˈna opuaraa i te taata e rave rahi.

E tano roa ia tiaturi tatou e ua fatata Iehova i te ohipa mai no te faaraa i to ˈna iˈoa. (Ezek. 36:23) Te piri oioi maira te taime e haamamûhia ˈi te feia atoa e faaino ra i taua iˈoa ra. E riro ïa te reira ei mahana faahiahia mau no te mau tavini taiva ore atoa a Iehova, tei faaite i to ˈna iˈoa e tei turu i to ˈna mana arii o te ao taatoa!

Ua ite-maitai-hia ta Iehova aupuru î i te here i to ˈna nunaa i te mau tairururaa mataeinaa e nunaa rau “E ara!” tei tupu i te fenua e rave rahi i 2009. E tupuraa faufaa roa tera mau tairururaa i roto i te tuatapaparaa o te nunaa o Iehova, o tei faaitoito mai ia taa ˈtu â i te faufaaraa ia tiai ru i te mahana o Iehova.—Mat. 24:42; Tes. 1, 5:1, 2, 4.

Te hamani maitai mau nei Iehova ia tatou; te faaî nei oia i to tatou aau i te oaoa. I roto i te mau vahi heeuri e aua mai ai oia ia tatou e e aratai oia ia tatou na pihai iho i te pape atatia ra.—Sal. 23:1, 2; 100:2, 5.

Ia papu ia outou, e au mau hoa o te ao nei, e e haamaitai noa Iehova ia outou ia tamau outou i te tavini ia ˈna i teie mau avaˈe i mua!

Ma to matou here Kerisetiano,

To outou mau taeae,

Tino aratai a te mau Ite no Iehova