‘A haere mai a pee mai ai ia ˈu’
1. Eaha ta tatou e hiˈopoa i te Haapiiraa Bibilia a te amuiraa i mua nei?
1 Te horoa ra na Evanelia e maha i te hoê faatiaraa maramarama maitai no nia ia Iesu, te Tamaiti a te Atua. Ei Kerisetiano e ‘pee ra i to ˈna taahiraa avae,’ e faaineine maitai e e horoa anaˈe ïa i te tariˈa faaroo a hiˈopoahia ˈi te buka ‘A haere mai a pee mai ai ia ˈu’ i te Haapiiraa Bibilia a te amuiraa i te hebedoma o te 1 no Mati. (Pet. 1, 2:21; Mar. 10:21) E au ia haapao-taa-ê-hia te mau tuhaa o te oraraa o Iesu o te faaitoito ia tatou i roto i te taviniraa.
2. Eaha te huti mai i to Iesu faaoromai?
2 To Iesu hiˈoraa: Ua faaû anei paha oe i te huru au ore a poro ai i tera e tera fare? I mua i tera huru au ore, e taa maitai aˈe tatou i ta Iesu mau parau: “I hamani ino na ratou ia ˈu ra, e hamani ino atoa ïa ratou ia outou.” (Ioa. 15:20) E ere iho â te mau parau patoi atoa i te hamani-ino-raa. No te oaoa râ i tuuhia mai i mua ia ˈna i faaoromai ai Iesu i te mau tamataraa e fifi rau atoa. E nehenehe atoa tatou e tiatonu i nia i te noaaraa te farii maitai a Iehova e te haamaitairaa no to tatou taiva ore. E tauturu mai te reira ia ore ‘ia toaruaru e ia ore ia taiâ to tatou aau.’ (Heb. 12:2, 3; Mas. 27:11) Ia tutava tatou i roto i te taviniraa, e papu ia tatou e e turu mai te Mesia ra o Iesu.—Mat. 28:20.
3. E nafea ia pee i ta Iesu huru hiˈoraa i te taviniraa?
3 ‘No reira vau i tonohia mai ai’: O te pororaa i te Basileia te tuhaa faufaa o te oraraa o Iesu. (Luka 4:43) Ua horoa oia ia ˈna iho i roto i te taviniraa. Ua faariro oia i te reira ei mea ru, ua imi noa oia i te ravea no te aparau no nia i te Basileia. Ei pǐpǐ na Iesu, e aratai te peeraa i to ˈna hiˈoraa ia tatou ihea? I roto i ta tatou mau haaraa i te mau mahana atoa, e taata anei ta tatou e nehenehe e faaite i te parau apî maitai? Ia turai te here o te Mesia ia tatou ia faaite hua i te parau apî maitai!—Kor. 2, 5:14.
4. E nafea ia haamaitai i ta tatou taviniraa?
4 “Aita roa e taata e au te parau i ta tera aˈera taata”: Ua maere te taata i ta Iesu huru haapiiraa. (Ioa. 7:46; Mat. 7:28, 29) No te aha oia i taa ê ai i te tahi atu feia haapii? Ua au roa oia i te pue parau mau ta ˈna i tufa, ua here oia i te taata ta ˈna i haapii atu, e ua rau te mau ravea haapiiraa ta ˈna i faaohipa. Ma te pee i te hiˈoraa o te Orometua Rahi, e haamaitai tatou i ta tatou taviniraa.—Luka 6:40.
5. Eaha ta tatou fa a hiˈopoahia ˈi te buka ‘A haere mai a pee mai ai ia ˈu’?
5 O te tahi noa teie o te mau taoˈa rahi o te oraraa o Iesu. Eaha ˈtu â ta oe i ite? A hiˈopoahia ˈi to Iesu oraraa i te Haapiiraa Bibilia a te amuiraa, o te ‘iteraa i te aroha o te Mesia’ ma te pee i ta ˈna mau parau e haaraa ïa ta oe fa.—Eph. 3:19.