Ia taatoa oe no ta oe mau piahi!
1. Eaha te titauhia no te tauturu i te hoê piahi Bibilia?
1 No te tauturu i te hoê piahi Bibilia e tae roa ˈtu i te pûpûraa ia ˈna iho, eita e navai ia faatere tamau noa i ta ˈna haapiiraa. Ua faaau te aposetolo Paulo i to ˈna mau taairaa e te feia ta ˈna e haapii ra i te hoê metua vahine e aupuru ra i ta ˈna tamarii. Oia atoa, e horoa anaˈe ïa ia ‘tatou iho’ no te tauturu i ta tatou mau piahi ia paari i te pae varua.—Tes. 1, 2:7-9.
2. No te aha e anaanatae ai i te piahi, e e nafea?
2 A anaanatae atu i te piahi: A faaohipa ˈi oia i ta ˈna e haapii ra, e turai to ˈna manaˈo haava ia ˈna eiaha e amuimui faahou i te feia aita e pee ra i te mau faaueraa tumu Bibilia. (Pet. 1, 4:4) E fariu ê paha to ˈna utuafare ia ˈna. (Mat. 10:34-36) No teie ereraa, e nehenehe paha ïa tatou e anaanatae roa ˈtu â ia ˈna. Te faaitoito ra te hoê mitionare: “Eiaha e vaiiho oioi i te piahi i te otiraa iho â te haapiiraa. Ia nehenehe, a paraparau faahou â.” A pûpû atu i te tauturu e au. A taniuniu aore ra a haere e hiˈo ia ˈna ia maˈihia oia. A parahi atoa paha i pihai iho ia ˈna i te mau putuputuraa e a tauturu ia ˈna ia haapao i te tamarii.
3. E nafea ta tatou piahi e fanaˈo ai i te faaitoitoraa a te amuiraa?
3 Te tauturu a te amuiraa: Ia poro oe na to ˈna ra vahi nohoraa, a farerei poto atu paha ia ˈna ia matau oia i to oe hoa pororaa. I te tahi taime, ua tano anaˈe, a ani i te tahi atu feia poro, te mau matahiapo atoa, ia apiti mai i te haapiiraa. I muri iti aˈe atoa i te haamauraa oe i te haapiiraa, a faaitoito i ta oe piahi ia haere mai i te mau putuputuraa i te Piha a te Basileia. E fanaˈo ïa oia i te auhoaraa faaitoito o te amuiraa o te riro mai paha ei utuafare pae varua no ˈna.—Mar. 10:29, 30; Heb. 10:24, 25.
4. E nafea to tatou itoito e haamaitaihia ˈi?
4 E oaoa mau te metua o te paturu ma te tuutuu ore i ta ˈna mau tamarii i te pae varua ia tia ratou i te pae o Iehova e ia haapao ratou i te parau mau. (Ioa. 3, 4) Hoê â atoa to tatou oaoa ia taatoa tatou no ta tatou mau piahi Bibilia.