A haapii ma te ohie
1. Eaha te hoê tuhaa faufaa o te haapiiraa manuïa e te maramarama?
1 E mea faufaa roa te huru ohie no te haapii ma te manuïa. E nehenehe te hiˈopoaraa i te huru haapiiraa a te Orometua rahi ra o Iesu e tauturu ia tatou ia haamaitai i ta tatou “haapii-maite-raa ˈtu.”—Tim. 2, 4:2; Ioa. 13:13.
2. Eaha tei titauhia no te haapii ma te huru ohie, e eaha te mau faahopearaa o taua huru haapiiraa ra?
2 A paraparau ma te huru ohie: I roto i te Aˈoraa i nia i te mouˈa, te vai ra vetahi mau parau mau hohonu roa ˈˈe ta te taata i ore aˈenei i parau, ua faahitihia te taatoaraa ma te huru ohie. (Mat., pene 5-7) “Ua maere” te taata atoa i faaroo ia Iesu “i te huru o ta ˈna parau.” Ua parau te feia toroa tei tonohia no te haru ia ˈna: “Aita roa e taata e au te parau i ta tera aˈera taata.” (Mat. 7:28, 29; Ioa. 7:46) Aita e faufaa ia faaohipa i te mau parau paari e te fifi ia taa, aore ra te mau faahohoˈaraa tatara-huˈahuˈa-hia ia papu i te taata e tera iho â te parau mau. E nehenehe te parau mau e faataa-maramarama-hia na roto i te mau taˈo matauhia.
3. No te aha paha vetahi e hinaaro ai e horoa e rave rahi roa manaˈo i te feia e faaroo ra ia ratou, e e nafea ia ape i te reira?
3 A feruri ehia rahiraa: Ua haapao maite Iesu i te feia e faaroo ra ia ˈna ma te feruri ehia rahiraa manaˈo e horoa na ratou i te taime hoê. (Ioa. 16:12) Ia hiˈo maite e ia faaau ohie atu tatou e tia ˈi, ia poro iho â ra tatou i te fetii, te feia tei anaanatae apî mai, aore ra i te tamarii. E ara tatou eiaha ia rahi roa te manaˈo e horoa, noa ˈtu e te faaroo maite mai ra paha ratou. E tamau noa te feia aau haavare ore i te ite i te Atua mau ra o Iehova.—Ioa. 17:3; Kor. 1, 3:6.
4. No te aha e mea maitai ai ia haapao noa i te mau manaˈo faufaa eiaha i te mau manaˈo rii?
4 A haapao noa i te mau manaˈo faufaa: Aita Iesu i haafifi roa ˈtu â i ta ˈna haapiiraa ma te faaô mai e rave rahi roa manaˈo rii. Ia ˈna i parau: “Te feia atoa i roto i te apoo ra . . . e haere mai i rapae,” e ere te reira i te taime no ˈna no te faarahi i te parau no nia i na tiaturiraa e piti o te feia e faatia-faahou-hia mai. (Ioa. 5:28, 29) Ia faatere tatou i te haapiiraa bibilia, e mea tia ia haapao tatou i te mau manaˈo faufaa e ia ape i te hinaaro e faaô mai i te tahi atu mau tumu parau.
5. E fanaˈo tatou i teihea haamaitairaa ia haapii tatou ma te ohie?
5 Auê tatou i te mauruuru e ua haapii mai Iehova ia tatou ma te ohie i te mau mea atoa ta tatou e hinaaro e ite! (Mat. 11:25) Ia tutava ïa tatou i te haapii ma te ohie e i te oaoa i te hoê taviniraa manuïa.