A haapii i te feia e fifi nei i te taio
1. E nehenehe tatou e faaû i teihea fifi i roto i te taviniraa?
1 A apiti ai tatou i te taviniraa, e faaû tatou i te tahi mau taime i te fifi e haapii i te parau mau i te feia e fifi nei i te taio. Eaha ta tatou e nehenehe e rave?
2. E nafea e no te aha tatou e faatura ˈi i te feia e fifi nei i te taio?
2 A faatura ia ratou: O te huru aau o te hoê taata, eiaha ta ˈna haapiiraa i roto i teie nei ao, te mea faufaa no Iehova. (Sam. 1, 16:7; Mas. 21:2) No reira, eita tatou e vahavaha i te feia e fifi nei i te taio. E riro atu â taua mau taata ra i te farii i ta tatou tauturu ia faaite atu tatou i te faatura e te faaoromai. (Pet. 1, 3:15) O te ore-atoa-raa ïa e onoono ia taio taua taata ra i te hoê irava aore ra i te hoê paratarafa. A haapii hau atu â ˈi te hoê taata i te pue parau mau bibilia faufaa roa, e riro paha oia i te haamaitai atu â i ta ˈna taioraa e i te oaoa ˈtu â i te taio i te Parau a te Atua ma te reo mǎrû “i te rui e te ao.”—Sal. 1:2, 3.
3. Teihea mau ravea haapiiraa e nehenehe e faaohipahia no te haapii i te feia e fifi nei i te taio?
3 Te tahi mau ravea haapiiraa no te mau haapiiraa bibilia: E ravea maitai roa te mau hohoˈa no te haapii e te haamanaˈo. E nehenehe oe e ui i te piahi eaha ta ˈna e ite ra i nia i te hohoˈa i roto i te papai ta orua e faaohipa nei. E a faaohipa i te mau uiraa taa maitai no te tauturu ia ˈna ia taa eaha ta te hohoˈa e haapii mai ra. A faaohipa i te mau irava o te haapii i te tahi mau tuhaa o te hohoˈa. E nehenehe te mau hohoˈa e faaohipa-atoa-hia no te haamanaˈo i te haapiiraa. Eiaha e faarahi roa i te paratarafa ia hiˈopoa i te hoê noa taime. A haamahitihiti i te manaˈo tumu e te mau tuhaa faufaa o te haapiiraa, e a ape i te faaô mai i te mau manaˈo ê atu. A taio i te mau irava i roto roa i te Bibilia, e a faaohipa i te mau uiraa ia papu e ua maramarama te piahi i ta ˈna i taio. E faarahi te reira i to ˈna hinaaro e haamaitai i ta ˈna taioraa no te imi atu â i te pue parau mau bibilia o ˈna anaˈe.
4. E nafea tatou e tauturu ai i ta tatou piahi ia haamaitai i ta ˈna taioraa?
4 Te tahi mau tauturu no te haamaitai i te taioraa: E nehenehe te feia e fifi nei i te taio aore ra aita e taime maitatai to ratou no te haapii i te taio ma te ohie, e taa e e haamanaˈo maitai roa i te mau haamaramaramaraa. E nehenehe oe e faaitoito i taua mau taata ra ia faaroo maitai i te taata e taio maitai ra a apee noa ˈi i te taioraa i roto i ta ratou iho papai, e ia faahiti faahou i te mau taˈo ma te reo mǎrû. E tauturu te reira i te taata ia haamaitai i ta ˈna taioraa. E riro atoa te buka rairai A tutava i te haapii i te taio e i te papai i te tauturu ia ˈna. I te tahi mau vahi, e nehenehe te mau matahiapo e faanaho i te mau piha taioraa i roto i te amuiraa. Maoti teie mau ravea e nehenehe ai tatou e tauturu i te feia e fifi nei i te taio ia taa i “te parau moˈa” ia paari ratou e tae noa ˈtu i te ora.—Tim. 2, 3:15.