Rata a te Tino aratai

E au mau hoa Ite no Iehova e:

Mea oaoa mau ia papai ia outou e te mau taeae here e! Hoê â to matou manaˈo e to te aposetolo Ioane, o tei parau e ‘ua aroha mau’ oia i to ˈna mau hoa Kerisetiano e ua oaoa ia ratou e ‘haapao ra i te parau mau.’ (Ioa. 2, 1, 4) Auê ïa haamaitairaa te parau mau no tatou paatoa! Ua faatiamâ mai te parau mau ia tatou ia Babulonia Rahi e i ta ˈna mau haapiiraa e tutuu e faaino ra i te Atua. Ua tauturu te faarooraa i te parau mau ia tatou ia riro mai ei taata î i te here, mǎrû, aroha hamani maitai. E auaa te parau mau e tiaraa mâ ˈi to tatou i mua i te Atua e e fanaˈo atoa ˈi i te tiaturiraa o te ora mure ore.

Eaha tatou i te mauruuru atoa no to Iehova varua, o te aratai ra e te haapuai ra ia tatou i te mau mahana atoa! Te tiaturi nei matou e ua oaoa outou i te hiˈopoaraa i te tuhaa rau o tera faanahoraa î i te here no ǒ mai ia Iehova ra i te tairururaa mataeinaa aita i maoro aˈenei “Arataihia e te varua o te Atua.” A ino noa ˈtu ai te mau huru tupuraa o te ao, e mea faufaa roa ia turui tatou i nia i te varua puai o Iehova no te aratai ia tatou i te mau mahana faaruru atâ i mua ia tatou.

Ua papu ia matou e ua putapû to outou aau i te taioraa i te mau aamu anaanatae roa i roto i te Annuaire e i te tahi atu mau papai o to tatou mau taeae o tei faaruru i te mauiui e rave rahi no to ratou faaroo. E mea maere ia manaˈo e no bapetizo-noa-hia ˈtura e rave rahi o tera mau taata haapao maitai aore ra aitâ i bapetizohia ˈtura a fa mai ai te mau fifi. Auê tatou i te here rahi ia ratou no to ratou taiva ore e to ratou patururaa i te parau-tia! Oia mau, e haapaari to ratou hiˈoraa maitai roa i ta tatou faaotiraa papu e vai taiva ore noa i te Basileia noa ˈtu eaha te fifi te nehenehe e fa mai.—Tes. 1, 1:6-8.

Ua ite matou, e te mau taeae e tuahine here, e te faaruru ra outou e rave rahi fifi, i te pae faanavairaa faufaa anei e te vai ra ˈtu â, ia nehenehe to outou utuafare ia vai tahoê noa i roto i te here. No vetahi o outou, e mea fifi atoa ia turu i te ohipa pororaa i te Basileia e i te tahi atu mau ohipa faufaa a te amuiraa ma te tamau e te taiva ore. No reira, i muri aˈe e rave rahi aparauraa e pure, ua rave matou i vetahi mau tauiraa i roto i te mau putuputuraa a te amuiraa mai te 1 no Tenuare 2009 atu. Te tiaturi nei matou e e haafaufaa outou i teie mau faatanoraa no te faataa hau atu â i te taime no ta outou iho haapiiraa e te utuafare.

I te mau tairururaa rau o teie matahiti, e mea oaoa mau ia ite e rave rahi taata o tei faaî i te mau titauraa no te bapetizoraa. E mea apî roa vetahi o ratou. Te haapopouhia ra outou, te mau metua, no te haapiiraa i ta outou mau tamarii ia faaite i te mauruuru no te parau mau e no te faaitoitoraa ˈtu ia pûpû ia ratou no te tavini ia Iehova i te apîraa ra. Te paraparau maitai roa ra tera feia apî here, e faaruru nei e rave rahi fifi i te fare haapiiraa e o tei bapetizohia râ, no te haamataroraa ta ratou i fanaˈo i te fare.—Sal. 128:1-6.

Te hinaaro atoa ra matou e faahiti i te maraaraa faahiahia o te mau haapiiraa bibilia—e tuhaa rahi ta ta tatou mau mitionare e pionie taa ê itoito i roto. Te haafaufaa rahi nei matou paatoa o te Tino aratai i te tuhaa rahi ta to tatou mau taeae e tuahine na te ao atoa nei e rave nei ma te parau “E haere mai!” i te feia aau haavare ore, ma te titau manihini i te taatoaraa e poihâ nei ia ‘rave noa mai i te pape ora.’ (Apo. 22:17) Te farii mahanahana nei tatou i roto i to tatou fetii taeae na te ao nei i na taata e 289 678 o tei faataipe i ta ratou pûpûraa na roto i te bapetizoraa i roto i te pape i teie matahiti i mairi aˈenei!

E mea maitai ia haamanaˈo noa tatou i te mau parau a te aposetolo Ioane, o tei papai: “Te mou nei hoi teie nei ao, e ta to te ao atoa e hinaaro nei; o tei haapao râ i to te Atua ra hinaaro, e tia ïa i te oraraa e a muri noa ˈtu.” (Ioa. 1, 2:17) E ia manaˈo atoa e te piri roa nei tatou i te taime e “mou” ai teie nei ao! E haerea paari ïa ia niu i to tatou oraraa i nia i te raveraa i te hinaaro o te Atua e ia “ara.” (Mat. 24:42) Eita roa ˈtu tatou e tatarahapa ia na reira tatou, e e ooti tatou i te mau haamaitairaa o to Iehova aau aroha.—Isa. 63:7.

Te tiaturi nei matou e e riro te mau aamu putapû no e rave rahi fenua i roto i te Annuaire 2009 ei faaitoitoraa no outou paatoa ia tuu i te mau faufaa a te Basileia i te parahiraa matamua i roto i to outou oraraa. Te hinaaro nei matou e haapapu e tei roto noa outou i to matou mau manaˈo e ta matou mau pure e mea here roa na matou ia outou. Ia haamaitai rahi mai Iehova ia outou.

To outou mau taeae,

Tino aratai a te mau Ite no Iehova