Ia ineine maitai tatou no te Oroa haamanaˈoraa

Auê ïa oaoa e fanaˈoraa taa ê no te mau pǐpǐ a te Mesia ia faaineine maitai no te po e haamanaˈohia ai te pohe o Iesu Mesia! (Luka 22:19) Eaha te mau faanahoraa tei au ia ravehia no te faaineine i te Oroa haamanaˈoraa?

◼ Te hora e te vahi: Ia taa maitai i te taatoaraa i te hora e te vahi tia o te Oroa haamanaˈoraa e tia ˈi. Ia putuputu hau atu i te hoê amuiraa i te Piha a te Basileia, e mea faufaa ia tae atu i te hora tia e ia hoˈi atu ma te naho maitai, i te mea e aita rea taime i rotopu i te putuputuraa taitahi. Mea faufaa ia haa maite ia ore ia apǐapǐ te tomoraa, te hiti purumu, e te vahi vairaa pereoo.

◼ Titau-manihini-raa: E titau-manihini-raa anei ta te feia poro atoa, e ua ite anei ratou i tei papaihia i roto? Ua faaineine anei oe e nafea oe e pûpû ai i tera titau-manihini-raa? E horoa oe i te reira ia vai? A rave i te tutavaraa no te opere i te mau titau-manihini-raa atoa.

◼ Faurao: E hinaaro paha vetahi feia i faaite i te anaanatae e tau taeae e tuahine atoa i te hoê faurao aore ra i te tahi atu tauturu. Eaha te mau faanahoraa tei ravehia no te haapao i to ratou mau hinaaro?

◼ Te mau taoˈa taipe: E ara ia ore te mau taoˈa taipe ia faaterehia na mua ˈˈe i te toparaa mahana. E ravehia te mau faanahoraa no te afai atu i te mau taoˈa taipe i te mau melo faatavaihia atoa i maˈihia e o te ore e tae mai. E ravehia mai te pane e te uaina e au ia ineine te reira e tia ˈi.—A hiˈo i Te Pare Tiairaa o te 1 no Mati 2003, api 10-1, paratarafa 14, 17.

◼ Piha a te Basileia: E tamâ-maitai-hia na mua ˈˈe te piha. E afaihia i te piha te mereti, te hapaina, te hoê airaa maa e te hoê vauvau airaa maa e au, e e faanahohia te reira na mua ˈˈe i te oroa. Mai te peu e e faaohipahia te tahi atu vahi putuputuraa, ia papu e e tano te faanahoraa o te haapurororaa, ia nehenehe te taatoaraa i tae mai e faaroo i te taeae orero. E maiti-oioi-hia te mau taeae no te fariiraa e no te tuati e e horoa-oioi-hia ia ratou te mau faaueraa no nia i ta ratou tuhaa, e nafea ia rave atu, e te faufaaraa o te ahuraa e o te faaneheneheraa rouru tura.

I tera tupuraa faufaa roa ˈˈe, te Oroa haamanaˈoraa i te poheraa o Iesu Mesia, e hinaaro tatou ia ineine maitai tatou taitahi e ei amuiraa. Papu maitai e e haamaitai rahi Iehova i te taata atoa e faaite i te aau mauruuru no te mau mea atoa ta ˈNa i horoa no te huitaata na roto i te tusia o ta ˈna Tamaiti here ra o Iesu Mesia.