“E na reira outou ei manaˈoraa ia ˈu”
E tupu te Oroa haamanaˈoraa i te poheraa o Iesu i te 2 no Eperera
1. No te aha e taio mahana faufaa ˈi te 2 no Eperera 2007?
1 I te 2 no Eperera 2007, e tairuru te mau mirioni taata na te ao nei no te haamanaˈo i te pohe tusia o Iesu. Ua pohe o Iesu ei turu i te mana arii o to ˈna Metua i te raˈi, a horoa ˈi oia i te haapapuraa e mea hape te faahaparaa a te Diabolo ra o Satani e te tavini ra te huitaata i te Atua ma te mau hinaaro miimii noa. (Ioba 2:1-5) Te haamanaˈo atoa ra te Amuraa maa ahiahi a te Fatu ia tatou e na roto i to ˈna poheraa ei taata tia roa e te hara ore, ua “horoa” o Iesu “i to ˈna ora ei hoo no te taata e rave rahi.” (Mat. 20:28) No reira, ua faaue Iesu i ta ˈna mau pǐpǐ: “E na reira outou ei manaˈoraa ia ˈu.” (Luka 22:19) Te turai ra anei te mauruuru no teie ô faufaa roa a te Atua ia oe ia haamata i te rave i te mau faaineineraa no te haamanaˈo i teie ohipa rahi roa ˈˈe o te here?—Ioa. 3:16.
2. E nafea tatou e nehenehe ai e faaineine i to tatou aau no te Oroa haamanaˈoraa?
2 A faaineine i to oe aau: Ma te hiˈopoa hoê hoê i tei tupu i te mau mahana hopea o te oraraa ei taata o Iesu, e nehenehe tatou e faaineine i to tatou aau no te Oroa haamanaˈoraa. (Eze. 7:10, MN) Ei tautururaa ia tatou no te reira, e nehenehe e itea mai te hoê porotarama taa ê o te taioraa bibilia i roto i te buka iti ra E hiˈopoa anaˈe i te mau Papai i te mau mahana atoa—2007 e i roto i te Calendrier 2007. E tano roa teie porotarama taioraa i te mau mahana o te mau tupuraa no nia i te poheraa o Iesu i te tarena ta tatou e faaohipa nei i teie mahana. Ua niuhia te mau mahana e taio mahana e tano i te faatiaraa bibilia i nia i te tarena ati Iuda, o tei taiohia mai te toparaa mahana e tae atu i te toparaa mahana i muri iho. E haapaohia teie taa-ê-raa i roto i te porotarama taioraa bibilia o te Oroa haamanaˈoraa. E tauturu te hiˈo-faahou-raa i taua haamaramaramaraa ra e te feruriruriraa ma te pure i te hohonu o te here o te Atua ia tatou ia faufaa-roa-hia i te Oroa haamanaˈoraa.
3. E nafea tatou e tauturu ai i te feia tei anaanatae e te feia aita e poro faahou ra ia faufaahia i te Oroa haamanaˈoraa?
3 A titau manihini i te tahi atu ia haere mai: Ua faaara te api hau i roto i Ta tatou taviniraa i te Basileia no Fepuare i te hoê opereraa taa ê no te titau manihini i te taata i tera tupuraa faufaa. Ua rave anei oe i te mau faanahoraa no te apiti roa i tera opereraa? Ua papai anei oe i te hoê tapura o te feia matauhia no te titau manihini, e ua haamata anei oe i te farerei ia ratou? A faanaho i te tae oioi mai i te ahiahi o te Oroa haamanaˈoraa no te farii i te feia ta oe i titau manihini e tae noa ˈtu i te tahi atu feia anaanatae. E parahi paha oe i pihai iho ia ratou, ma te ara e e Bibilia e e buka himene ta ratou. A parau i to ratou iˈoa i te tahi atu i roto i te amuiraa. I muri aˈe i te porotarama a tamata i te pahono i ta ratou mau uiraa. A titau manihini ia ratou ia apiti i te oreroraa parau taa ê o te horoahia i te 15 no Eperera. E hinaaro te mau matahiapo iho â râ e ara e e titau-manihini-raa i te Oroa haamanaˈoraa e i te oreroraa parau taa ê ta te feia poro aita e haere faahou ra i te mau putuputuraa.
4. E nafea tatou e nehenehe ai e tauturu i te mau taata ia tamau i te haere i mua i te pae varua i muri aˈe i te Oroa haamanaˈoraa?
4 A tauturu i te feia tei anaanatae apî e te feia aita e poro faahou ra ia haere i mua: E faataa poto te taeae orero i te Oroa haamanaˈoraa i ta tatou faanahoraa o te haapiiraa bibilia e e faaitoito i te feia tei anaanatae apî ia tamau i te haapii no nia ia Iehova. E nehenehe oe e faaohipa i ta ˈna mau tatararaa ei niu no te pûpû i te tauturu pae varua hau i te feia ta oe i titau manihini. Mai te peu e aitâ ratou e haapii atura i te Bibilia, a ara i te farerei oioi faahou ia ratou i muri aˈe i te Oroa haamanaˈoraa e a faaite i te tereraa o te haapiiraa bibilia tamoni ore. No te haere i mua i te pae varua, e titauhia atoa ia haere ratou i te mau putuputuraa a te amuiraa. (Heb. 10:24, 25) No te na reira, a faaitoito ia ratou ia haamata i te haere tamau atu. E mea titauhia ia farerei faahou te mau matahiapo i te mau Kerisetiano aita e poro faahou ra o tei haere mai i te Oroa haamanaˈoraa e e tauturu ia ratou ia haapao atu â i te mau manaˈo i faaitehia i te oreroraa parau. E faaitoito paha te reira ia ratou ia rave faahou i ta ratou ohipa i roto i te amuiraa.
5. E nafea tatou e maitaihia ˈi i te haapaoraa i te Oroa haamanaˈoraa?
5 E pûpû te Oroa haamanaˈoraa i te hoê ravea maitai no te feruriruri maitai i ta Iehova e Iesu i rave no tatou. E faarahi taua feruriruriraa ra i to tatou here ia raua e e ohipa te reira i nia i to tatou haerea. (Kor. 2, 5:14, 15; Ioa. 1, 4:11) Teie te taime no te haamata i te faaineine ia tatou iho e te feia tei anaanatae no teie tupuraa faufaa ‘a faaite ai tatou i te pohe o te Fatu.’—Kor. 1, 11:26.