Tuhaa 6: E faatere anaˈe i te mau haapiiraa bibilia o te paturu i te mau haereraa i mua
Ia ui te hoê piahi i te hoê uiraa
1 Ia haamau-maitai-hia te hoê haapiiraa bibilia, e pinepine e mea maitai aˈe ia hiˈopoa i te mau haapiiraa bibilia ma te nanai maitai eiaha râ e taui noa i te tumu parau. E tauturu te reira i te piahi ia fanaˈo i te niu i roto i te ite mau e ia haere i mua i te pae varua. (Kol. 1:9, 10) E pinepine râ te mau piahi i te ui i te mau uiraa no nia i te tumu parau rau i te roaraa o te haapiiraa. E nafea ia ohipa ma te tano?
2 A haroaroa: E pinepine, e nehenehe e pahono oioi i te mau uiraa no nia i te mau manaˈo e haapiihia ra. Mai te peu e e pahonohia te hoê uiraa i muri roa ˈˈe i roto i te papai, e nehenehe noa ïa e faaara ˈtu. Tera râ, mai te peu e aita roa ˈtu e auraa to te uiraa e te tumu parau e hiˈopoahia ra aore ra e titauhia te tahi mau maimiraa, e mea au aˈe ia aparauhia te reira i muri aˈe i te haapiiraa aore ra i te tahi atu taime. Ua ite vetahi e mai te peu e e papaihia ta ˈna uiraa e taa ïa i te taata e e haapao maitai tatou i te reira mai tei titauhia, e e ape te reira i te faaatea ê i te tumu parau.
3 E rave rahi haapiiraa bibilia tei hiˈopoa-poto-noa-hia i roto i ta tatou mau papai haapiiraa tumu. E nafea ïa mai te peu e e mea fifi no te piahi ia farii i te tahi haapiiraa aore ra te tapea maite noa ra oia i te hoê tiaturiraa hape? E titauhia paha ia hiˈopoa i te tahi atu papai o te vauvau huˈahuˈa ra i te haapiiraa bibilia no nia i te reira. Mai te peu e aita iho â te piahi e papu ra, a vaiiho i te tumu parau no te tahi atu taime e a tamau i te rave i ta ˈna haapiiraa. (Ioa. 16:12) A maraa ˈi to ˈna ite i te Bibilia e a haere ai oia i mua i te pae varua, e nehenehe oia e taa i ta te Bibilia e haapii ra.
4 A faahaihai: Mai te peu e aita outou e papu ra i te pahonoraa o te tahi uiraa, eiaha e ru noa i te pahono no te ape i te horoa i to outou iho manaˈo. (Tim. 2, 2:15; Pet. 1, 4:11) A faataa i te piahi e e rave outou i te mau maimiraa e e faaite atu outou i te pahonoraa i muri aˈe. E nehenehe atoa outou e faaohipa i te reira taime no te haapii ia ˈna ia rave i ta ˈna iho mau maimiraa. A faaite riirii ia ˈna e nafea ia faaohipa i te mau mauhaa maimiraa rau ta te faanahonahoraa a Iehova i horoa mai. Ia na reira outou, e nehenehe mau oia e pahono i ta ˈna iho mau uiraa.—Ohi. 17:11.