E haamauruuru anaˈe ia Iehova no to ˈna hamani maitai
E tupu te Oroa haamanaˈoraa i te poheraa o te Mesia i te 24 no Mati
1. Mea nafea to Iehova faaiteraa mai i te hamani maitai?
1 Ua parau te papai salamo e: “Ia haamaitai hoi ratou ia Iehova i to ˈna ra aroha [aore ra hamani maitai], e te ohipa ravea tae ê na ˈna i te tamarii a te taata nei.” (Sal. 107:8) E hau atu te hamani maitai o te Atua i to ˈna huru aau here noa no te taata. O ta teie ïa arueraa faaurua e faaite ra: “E tauturu mai to hamani maitai ra ia ˈu, e Iehova.” (Sal. 94:18) Auê ïa hamani maitai faahiahia roa ta Iehova i faaite ma te horoa mai i ta ˈna Tamaiti fanau tahi no tatou!—Ioa. 1, 4:9, 10.
2. E nafea tatou e faaite ai i to tatou mauruuru ia Iehova?
2 A fatata mai ai te Oroa haamanaˈoraa i te poheraa o te Mesia, e nafea tatou e haamauruuru ai i ‘te Atua aroha,’ aore ra hamani maitai? (Sal. 59:17) E hinaaro tatou e faataa i te taime no te feruriruri i te mau mahana hopea o Iesu i te fenua nei. (Sal. 143:5) E mea maitai ïa ia pee i te porotarama taioraa bibilia i faataa-taa-ê-hia no te Oroa haamanaˈoraa (a hiˈo i te buka iti E hiˈopoa anaˈe i te mau Papai i te mau mahana atoa—2005), e ia nehenehe, ia taio e ia hiˈopoa i te mau pene 112-6 o te buka Taata rahi roa ˈˈe e te tahi atu mau papai bibilia. A feruriruri i te mau irava ta outou e taio; a haamanaˈo papu i te reira. (Tim. 1, 4:15) Eita noa te feruriraa i te Parau a te Atua ma te pure e faaitoito i to tatou aau, e faaite atoa râ i to tatou here ia Iehova.—Mat. 22:37.
3, 4. (a) E nafea tatou e nehenehe ai e pee i te haerea o to tatou mau taeae no Liberia? (b) O vai ta outou e manaˈo e titau manihini i te Oroa haamanaˈoraa?
3 E turai anaˈe ia vetahi ê ia haamauruuru i te Atua: I te matahiti i mahemo, i te ao nei, 16 760 607 taata tei tae i te Oroa haamanaˈoraa. A tau matahiti aˈenei, i Liberia, ua faaite te mau taeae i te raatira, na roto i te rata, i to ratou hinaaro e faatupu i te Amuraa maa a te Fatu i roto i to ˈna oire. Aita noa te raatira i faatia ia faaohipa ratou i te vahi tueraa popo o te oire iti, ua rave atoa oia e ia faaite-haere-hia te oroa e ati aˈe. E 636 taata tei tae i te Oroa haamanaˈoraa, noa ˈtu e e pae noa taata poro to taua oire iti ra!
4 Mai taua mau taeae ra, e hinaaro tatou e tauturu e rave rahi atu â taata ia amui mai ia tatou i te Oroa haamanaˈoraa. No te aha e ore ai e papai i te iˈoa o te feia ta outou e hinaaro e titau manihini? E nehenehe outou e faaohipa i te mau titau-manihini-raa i te api hopea o te Réveillez-vous! o te 8 no Mati e Te Pare Tiairaa o te 1 no Eperera. E nehenehe atoa outou e faaohipa i te mau parau titau-manihini-raa e horoahia i roto i te amuiraa. A patapata aore ra a papai maitai i te hora e te vahi o te oroa i nia i te parau titau-manihini-raa, e a horoa hoê na te taata atoa ta outou e titau manihini. Na mua noa ˈˈe i te 24 no Mati, a farerei faahou ia ratou paatoa no te haamanaˈo atu e no te haapapu i te mau faanahoraa i ravehia.
5. E nafea ia faaitoito i te mau piahi Bibilia ia haere mai i te Oroa haamanaˈoraa?
5 E nafea ia tauturu i te hoê piahi Bibilia aitâ i haere atura i te mau putuputuraa ia haere mai i te oroa? A faataa maa minuti i te mau taime haapiiraa atoa no te tauturu ia ˈna ia taa i te faufaaraa o tera oroa. E nehenehe outou e taio i te mau manaˈo maitai roa i roto i te Tour de Garde o te 15 no Mati 2004, api 3-7, e te buka Haaferuriraa, api 277-80.
6. No te aha e mea faufaa ˈi ia manava i te mau manihini i te Oroa haamanaˈoraa?
6 E manava anaˈe i te mau manihini: I te Oroa haamanaˈoraa, a farerei atu i te mau manihini e a manava ˈtu. (Roma 12:13) E parahi anaˈe i pihai iho i ta tatou mau manihini; e horoa anaˈe i te tahi Bibilia e buka himene na ratou. E manava maitai iho â râ tatou i te mau taeae e tuahine atoa aita e poro faahou ra o tei tutava i te haere mai. E nehenehe to tatou huru maitai e tauturu ia ratou ia apiti tamau faahou i te amuiraa. (Luka 15:3-7) I taua oroa moˈa roa ˈˈe ra, ia faaitoito ïa tatou paatoa ia vetahi ê ia amui mai ia tatou no te haamauruuru ia Iehova no to ˈna “hamani maitai rahi.”—Sal. 31:21.