“Ia mahora . . . outou”
1. Eaha ta tatou taitahi hopoia?
1 I roto i te fetii taeae Kerisetiano, e hopoia na tatou taitahi te faatupuraa i te mahanahana i roto i te amuiraa. (Pet. 1, 1:22; 2:17) E tupu tera mahanahana “ia mahora” tatou te tahi i te tahi i roto i to tatou iho aau. (Kor. 2, 6:12, 13) No te aha e mea faufaa ˈi ia matau i to tatou mau taeae e tuahine?
2. No te aha e mea faufaa ˈi ia faatupu i te auhoaraa e to tatou mau hoa Kerisetiano?
2 E puai atu â te auhoaraa: Ia matau maitai aˈe tatou i to tatou mau hoa Kerisetiano, e haafaufaa rahi atu â ïa tatou i to ratou faaroo, faaoromai, e te tahi atu mau huru maitatai. E iti mai ta ratou mau hapa ia tatou e e puai atu â to tatou mau taairaa auhoa. Ia matau maitai tatou ia tatou, e nehenehe hau atu â tatou e faatupu i te maitai e e haamahanahana te tahi i te tahi. (Tes. 1, 5:11) E nehenehe tatou e “haamahanahana” te tahi i te tahi no te patoi i te mau huru ohiparaa iino a te ao a Satani. (Kol. 4:11) Auê te oaoa, i teie mau mahana fifi, ia fanaˈo i te mau hoa maitatai i rotopu i te nunaa o Iehova!—Mas. 18:24.
3. E nafea tatou e haamahanahana ˈi ia vetahi ê?
3 E nehenehe te mau hoa piri e haapuai e e tamahanahana taa ê ia tatou ia û tatou i te mau tamataraa ino mau. (Mas. 17:17) Te haamanaˈo ra te hoê vahine Kerisetiano o tei faaruru i te mau manaˈo haafaufaa ore ia ˈna iho e: “Ua faahiti mai te mau hoa i te mau manaˈo maitatai no nia ia ˈu iho no te tauturu ia ˈu ia upootia i nia i to ˈu mau manaˈo haafaufaa ore.” E haamaitairaa tera mau hoa no ǒ mai ia Iehova ra.—Mas. 27:9.
4. E nafea tatou e matau maitai aˈe ai ia vetahi ê i roto i te amuiraa?
4 A faaite atu i te anaanatae ia vetahi ê: E nafea tatou e mahora ˈi i roto i to tatou iho aau no te mau hoa faaroo? Hau atu â i te aroharaa ia vetahi ê i te mau putuputuraa Kerisetiano, a tutava i te faatupu i te aparauraa anaanatae e o ratou. Ma te ore e faaô roa ˈtu i roto i to ratou oraraa, a anaanatae maite atu. (Phil. 2:4; Pet. 1, 4:15) Te tahi atu ravea no te faaite i te anaanatae ia vetahi ê, o te titau-manihini-raa ïa ia ratou no te tamaa. (Luka 14:12-14) Aore ra e nehenehe outou e faanaho e poro e o ratou. (Luka 10:1) A hinaaro ai tatou i te matau maitai aˈe i to tatou mau taeae, te turu ra ïa tatou i te auhoêraa i roto i te amuiraa.—Kol. 3:14.
5. Eaha te hoê ravea e faaaano ai tatou i to tatou mau auhoaraa?
5 E maiti anei tatou i to tatou mau hoa i rotopu noa i te feia hoê â matahiti aore ra hoê â manaˈo to tatou? Eiaha tatou e vaiiho i taua mau mea ra ia taotia i te auhoaraa ta tatou e faatupu i roto i te amuiraa. Ua faatupu o Davida e o Ionatana mai ia Ruta e o Naomi atoa i te mau taairaa auhoa paari noa ˈtu te matahiti e te huru oraraa taa ê. (Ruta 4:15; Sam. 1, 18:1) E nehenehe anei outou e faaaano atu â i to outou mau auhoaraa? E mau haamaitairaa manaˈo-ore-hia ta outou e fanaˈo.
6. Eaha vetahi mau maitai ia mahora tatou i roto i to tatou iho aau no to tatou mau taeae?
6 Ma te mahora i roto i to tatou iho aau no vetahi ê, e faaitoito tatou te tahi i te tahi e e paturu tatou i te hau i roto i te amuiraa. Hau atu â, e haamaitai Iehova iho ia tatou no to tatou faaiteraa i te here i to tatou mau taeae. (Sal. 41:1, 2; Heb. 6:10) No te aha e ore ai e haamau ei fa na outou te matau-maitai-aˈe-raa i te taeae e tuahine e rave rahi roa?