Te hororaa a te hoê nuu puaahorofenua tei taaihia ia outou
1, 2. E nafea te mau tavini a te Atua i teie mahana e apiti ai i te tupuraa o te orama parau tohu i faahitihia i roto i te Apokalupo 9:13-19?
1 ‘Ua faaoto maira te tooono o te melahi i ta ˈna pu.’ I reira ‘te nuu puaahorofenua e piti muriadiraa i te muriadi’ e horo ai mai te haruru patiri. E ere i te mau nuu faehau au noa. “Te afii o taua mau puaahorofenua ra, mai te afii ïa o te liona ra.” Te puroro maira te auahi, te au auahi e te gopheri no roto mai i to ratou vaha, e “mai te ophi hoi to ratou aero.” Te haamou nei tera nuu puaahorofenua taipe e horo ra i te mau mea atoa i nia i to ˈna eˈa. (Apo. 9:13-19) Ua ite anei outou eaha te taairaa o te tupuraa o tera orama parau tohu faahiahia mau e o outou?
2 Te ohipa amui ra te toea faatavaihia e to ratou mau hoa o te mamoe ê atu no te faaite i te mau haavaraa a te Atua. Te reira, no te faaite roa i te huru pohe i te pae varua o te Amuiraa faaroo Kerisetiano. E hiˈopoa anaˈe e piti tuhaa o te orama parau tohu o te haamahitihiti ra i te tumu e manuïa ˈi te taviniraa a te mau tavini a te Atua.
3. Eaha te haapiiraa ta outou e fanaˈo nei no te faaite i te poroi a te Atua ma te manuïa?
3 Haapiihia e faaineinehia no te faatae i te poroi a te Atua: Maoti te Haapiiraa o te taviniraa teotaratia e te tahi atu mau putuputuraa a te amuiraa, te haapiihia ra te mau tavini a te Atua no te faaite i te poroi a te Atua ma te mana. Ia au i te hiˈoraa o Iesu e ta ˈna mau pǐpǐ, te haere nei ratou e imi i te feia e au, ma te poro i te mau vahi atoa e itehia ˈi te mau taata. (Mat. 10:11; Mar. 1:16; Luka 4:15; Ohi. 20:18-20) Mea manuïa roa tera raveraa bibilia no te pororaa.
4. Eaha te mauhaa i horoahia i te feia poro e rave rahi no te rave i ta ratou ohipa?
4 E mau miria Bibilia, buka, buka rairai, e vea tei operehia e te mau tavini Kerisetiano i roto i ta ratou ohipa pororaa faauehia e te Atua. E rave rau tumu parau e tano i te mau taata atoa i roto i taua mau papai ra tei pûpûhia na roto fatata e 400 reo. Te faaohipa ra anei outou i tera mau mauhaa ma te aravihi?
5, 6. Na te aha e faaite ra e te fanaˈo ra te mau tavini a Iehova i te turu no te raˈi?
5 Te aratairaa e te turu a te Atua: E mea papu e i roto i te orama parau tohu te fanaˈo ra te ohipa tei faahohoˈahia e te hororaa a te hoê nuu puaahorofenua taipe i te turu a te Atua. (Apo. 9:13-15) Te tupu ra te ohipa pororaa na te ao nei, eiaha maoti te paari e te puai taata, maoti râ te varua o te Atua. (Zek. 4:6) Te faaohipa nei Iehova i te mau melahi no te aratai i taua ohipa ra. (Apo. 14:6) No reira, no te faatae i te feia aau haehaa ia ˈna ra, e apiti Iehova i te turu no te raˈi i te mau tutavaraa a to ˈna mau Ite taata.—Ioa. 6:45, 65.
6 Haapiihia, faaineine-maitai-hia no te faatae i te poroi a te Atua e ma te ohipa i raro aˈe i te aratairaa a te mau melahi, e puai mau ore te nunaa o Iehova. E tamau anaˈe i te tapea i ta tatou hopoia i roto i te tupuraa o tera orama parau tohu faahiahia mau.