Hoê haapiiraa o te faaineine ia tatou no te mau ohipa faufaa roa ˈˈe

¹ E haere tatou i te haapiiraa ia noaa mai te faaineineraa e hinaarohia ia raea ta tatou mau fa. E nehenehe anei tatou e haamau i te mau fa faufaa aˈe i te arueraa i te Atua, tei horoa mai i te ora, e te tautururaa i to tatou taata-tupu ia ite i ta ˈna mau opuaraa e to ˈna mau eˈa? Eita ïa. Te fa a te Haapiiraa o te taviniraa teotaratia, o te faaineineraa ïa ia tatou ia haapii i to tatou faaroo ia vetahi ê. Na roto ïa i te haereraa ˈtu i te mau hebedoma atoa e noaa mai ai te aravihi o te faaineine ia tatou no te mau ohipa faufaa roa ˈˈe.

² Te vai ra te “Porotarama no te Haapiiraa o te taviniraa teotaratia 2003” i roto i Ta tatou taviniraa i te Basileia no te avaˈe i mahemo. Te faataa maitai ra tera porotarama i te tereraa o te haapiiraa. Mea maitai ïa ia tuu atu i roto i ta outou buka Tirez profit de l’École du ministère théocratique, ta outou e afai mai i te haapiiraa i te mau hebedoma atoa. E hiˈo faahou na tatou i te tahi mau tuhaa taa ê o te Haapiiraa o te taviniraa teotaratia 2003.

³ Tuhaa oreroraa: Mai Tenuare atu, e haamata te putuputuraa e te hoê oreroraa parau e pae minuti i nia i te hoê tuhaa oreroraa aore ra te hoê tuhaa o te taioraa, o te haapiiraa, aore ra o te horoaraa i te haapiiraa. Na te tiaau no te haapiiraa aore ra na te tahi atu matahiapo aravihi ta ˈna e maiti e hohora i tera mau vauvauraa. E nehenehe te taeae orero, ei hiˈoraa, e faataa i te auraa o te hoê tuhaa oreroraa e e haamanaˈo i to ˈna faufaaraa. Ia oti, e faahohonu oia i ta ˈna vauvauraa ma te haamataratara i te mau hiˈoraa bibilia e ma te faataa e nafea ia faaohipa i te tuhaa oreroraa; no reira, e faaite maitai oia e nafea te faaohiparaa i tera tuhaa e haamaitai ai i ta tatou taviniraa.

⁴ Vauvauraa n^o 1: Te faaara-faahou-hia ra te mau taeae o te vauvau i te oreroraa parau haapiiraa ia ‘huti i te ara-maite-raa i nia i te faufaaraa mau o te mau manaˈo e faataahia ra.’ Te auraa ra, ia faataa i te amuiraa e nafea ia faaohipa mau â i te mau manaˈo e vauvauhia ra. Mai te peu e na outou e hohora i teie vauvauraa, a hiˈo na i na api 48-9 o te buka École du ministère, e itea mai ia outou te tahi mau manaˈo tauturu e nafea ia faaineine ia outou, e a faahohonu na i te mau tuhaa tei papaihia te api i roto i te Index o te buka i te upoo parau “Application pratique.”

⁵ Porotarama taioraa bibilia: Mai te peu e aita outou i pee maite i te taioraa bibilia tahebedoma i mutaa iho, no te aha ïa e ore ai e faaoti e pee i tera porotarama i teie matahiti? E oti ïa i te feia e na reira i te taio i te mau Papai Heleni Kerisetiano i te hopea o te matahiti. Te faataa ra te buka École du ministère, api 10, paratarafa 5, i te maitai o te hoê porotarama taioraa bibilia ma te taio na mua i te mau Papai Heleni Kerisetiano.

⁶ Mau manaˈo faufaa o te taioraa bibilia: E vauvauhia teie tuhaa 10 minuti ia nehenehe te feia i putuputu mai e tatara i te taioraa no te hebedoma. Ia faatura te mau taeae o te vauvau i teie tuhaa i te taime i faataahia. E vauvauhia teie tuhaa i te mau hebedoma atoa, tae noa ˈtu i te hebedoma o te haamanaˈoraa parau vaha. A taio ai outou i te mau pene no te hebedoma, a tapao i te mau manaˈo e faufaahia ˈi outou i roto i ta outou haapiiraa utuafare, ta outou taviniraa, aore ra to outou oraraa. Eaha te mau huru maitatai o Iehova e itehia ra i roto i ta ˈna mau ohiparaa e te taata aore ra te mau nunaa? Eaha ta outou i haapii mai o tei haapaari i to outou faaroo e tei faarahi i to outou mauruuru ia Iehova? Eiaha e taiâ ia tatara i te mau pene atoa, tae noa ˈtu i te mau irava e taiohia i roto i te vauvauraa n^o 2, i te mea e eita te piahi e tatara i ta ˈna taioraa.

⁷ Vauvauraa n^o 2: Te vauvauraa matamua a te piahi no te hebedoma, e haamatauraa ïa i te taio i mua i te taata. E taioraa anaˈe no roto mai i te Bibilia, eiaha râ te taioraa hopea o te mau avaˈe atoa. No roto mai te taioraa hopea o te avaˈe i Te Pare Tiairaa. E taio te piahi i te tuhaa i faataahia aita e omuaraa parau e aita e faaotiraa. E nehenehe ïa o ˈna e haapao maite i to ˈna ite i te taio.—Tim. 1, 4:13.

⁸ Vauvauraa n^o 3 e te n^o 4: No te tahi o teie nau vauvauraa, e pinepine, e faaohipa te piahi i te buka Haaferuriraa; no te tahi atu, e faataa-noa-hia te manaˈo tumu. E nehenehe te feia e hohora i teie nau tuhaa e haamaitai i ta ratou vauvauraa na roto i te raveraa i te mau maimiraa i roto i ta tatou mau papai Kerisetiano. E nehenehe atoa ïa te mau tuahine e faaau i ta ratou mau tatararaa i to ratou apiti.

⁹ Mau huru tupuraa: Mai ta te buka École du ministère i te api 45 e faaite ra, e nehenehe te tiaau no te haapiiraa e faataa i te hoê huru tupuraa. Aita anaˈe, e nehenehe te mau tuahine e maiti i te tahi i roto i te tapura i te api 82. Mai te peu e e hohora te hoê tuahine i te hoê vauvauraa i te mau piti avaˈe atoa, e navai ïa na huru tupuraa e 30 i te roaraa e 5 matahiti. Ia maiti te mau tuahine i te n^o 30, oia hoi “Autre cadre de discussion adapté à votre région,” e papai ratou i te huru tupuraa i raro aore ra i muri i ta ratou api parau (S-89). E papai te tiaau no te haapiiraa i te taio mahana o te vauvauraa i te api 82 o ta ratou buka i pihai i te huru tupuraa e faaohipahia. E nehenehe oia e papai atu i te hoê â taime e tapao ai oia i ta ratou api parau aˈoraa.

¹⁰ Api parau aˈoraa: To roto ta outou api parau aˈoraa i ta outou buka. Tei te api 79-81. No reira, a horoa i ta outou buka i te tiaau no te haapiiraa i muri aˈe i ta outou vauvauraa taitahi. E papai ïa te tiaau no te haapiiraa i te hoê tapura o te mau tuhaa oreroraa ta te mau piahi e ohipa mai.

¹¹ Haamanaˈoraa parau vaha: E ravehia te haamanaˈoraa o te Haapiiraa o te taviniraa teotaratia ma te parau vaha. E tupu te reira i te mau piti avaˈe atoa e 30 minuti i te maoro. E tuu-noa-hia te mau uiraa o te haamanaˈoraa i roto i Ta tatou taviniraa i te Basileia. Mai te peu e e topa te haamanaˈoraa i te hebedoma o te hoê tairururaa haaati aore ra te tere o te tiaau haaati, e hohorahia te mau vauvauraa no te hebedoma i mua hoê hebedoma na mua ˈˈe e e ravehia te haamanaˈoraa i te hebedoma i muri mai.

¹² Mau piha hau: I roto i te mau amuiraa e ua hau atu te numera o te mau piahi i te 50, e manaˈo paha te mau matahiapo e faanaho i te mau piha hau. “E nehenehe teie faanahoraa e ravehia no te mau vauvauraa atoa a te mau piahi aore ra no na vauvauraa hopea e piti.” (École du ministère, api 285) E tano teie manaˈo hopea no te mau amuiraa e mea rahi te tuahine e mea iti te taeae no te rave i te taioraa. E maiti te mau matahiapo i te mau taeae aravihi no te haapao i teie mau piha.

¹³ Taeae aˈo mono: Mai ta te porotarama o te Haapiiraa o te taviniraa teotaratia e faaite ra, e maiti te tino matahiapo i te hoê taeae aˈo mono o te horoa i te tahi aˈoraa i te mau matahiapo e te mau tavini tauturu anaˈe o te vauvau i te mau manaˈo faufaa o te Bibilia e te mau oreroraa parau haapiiraa. E maitihia te hoê taeae aravihi, e faaturahia te aˈoraa e te tahi atu mau matahiapo. E horoa oia i te mau aˈoraa o te faaitoito, ma te haapopou i te mau taeae no te mau tuhaa oreroraa e te haapiiraa maitatai ta ratou i faaohipa, e ma te faaite atu hoê aore ra e piti tuhaa ia haamaitaihia. Aita e faufaa ia horoa i te aˈoraa i muri aˈe i te mau vauvauraa atoa a te hoê taeae o te apiti pinepine ra i roto i te mau putuputuraa. Teie râ, ia ite maite e ia taa i te taeae aˈo mono e e nehenehe e tauturu atoa i te mau taeae o te hohora aˈena ra i te mau oreroraa parau no te taatoaraa, ia haere i mua.—Tim. 1, 4:15.

¹⁴ E nafea ia faaroo: Eaha te tauturu i te hoê taeae aˈo ia hiˈopoa i te hoê vauvauraa? Te vai ra te hoê haapotoraa o te mea e faaroo i roto i te toru o te tumu parau tarenihia o te rahiraa o na pene tei papaihia te numera e 53 o te buka École du ministère. Ia haapao atoa te tiaau no te haapiiraa i te tahi atu mau haamanaˈoraa e mau manaˈo tauturu o te buka, o te tauturu ia ˈna ia aapo i te au-maite-raa o te tatararaa e te maitai o te vauvauraa. A hiˈo na i te mau uiraa i nia i te api 55 e te mau manaˈo o te paratarafa hopea o te api 163.

¹⁵ A faaî i te mau area: Hau atu i te mau area aano o te buka École du ministère, te vai ra te tahi mau area tei faataahia no te mau tapaopaoraa i roto i ta outou iho haapiiraa aore ra ia haere outou i te haapiiraa. (A hiˈo i te mau api 77, 92, 165, 243, 246, e 250.) A afai mai i ta outou buka i te mau hebedoma atoa. A pee i te oreroraa parau matamua i roto i ta outou buka. Eiaha e tapiri i ta outou buka e oti noa ˈtu te haapiiraa. A tapao i te mau manaˈo tauturu e horoahia e te tiaau no te haapiiraa. A faaroo maitai i te mau ravea haapiiraa, te mau uiraa, te mau hiˈoraa, te huru paraparauraa, te mau faahohoˈaraa, te hohoˈa mata e te mau taa-ê-raa e faaohipahia ra e te mau piahi. Ia rave outou i te mau tapaopaoraa maitatai, e itea mai â ia outou tera mau haamaramaramaraa e e faaohipa outou i te mau haapiiraa e rave rahi i hohorahia i te haapiiraa.

¹⁶ Ua ite maitai Iesu Mesia e e fanaˈoraa taa ê roa te pororaa i te parau apî maitai o te Basileia o te Atua e nehenehe e horoa na te hoê taata. Tera ta ˈna ohipa faauehia matamua. (Mar. 1:38) Ua parau oia e: ‘E parau haere â vau i te parau maitai o te basileia o te Atua, i tonohia mai ai hoi au.’ (Luka 4:43) No te mea ua farii tatou i ta ˈna titau-manihini-raa e apee ia ˈna, mea rahi atoa ta tatou ohipa i roto i te pororaa i te parau apî maitai, e te faaitoito noa ra tatou i te haamaitai i ta tatou ‘tusia arueraa.’ (Heb. 13:15, MN) Ma te haamanaˈo i tera fa, e faaoti papu tatou e apiti tamau i roto i te Haapiiraa o te taviniraa teotaratia, te hoê haapiiraa o te faaineine ia tatou no te mau ohipa faufaa roa ˈˈe.