E fanaˈo tatou i te haamaitairaa ia ueue tatou ma te faaherehere ore
1 Te moemoe nei tatou paatoa i te tupuraa o te mau parau fafau faahiahia e vai ra i roto i te Parau a te Atua. I teie nei, te pûpû maira Iehova i te mau haamaitairaa e rave rahi o te faanehenehe i to tatou oraraa. Teie râ, ua taai-rahi-hia te maitai e noaa mai ia tatou i ta tatou mau tutavaraa. Mai ta te aposetolo Paulo i parau, “o te ueue ma te faaherehere ore ra, e ooti ïa ma te rahi.” (Kor. 2, 9:6) E hiˈopoa anaˈe e piti tuhaa e au ai taua faaueraa tumu ra.
2 Ta tatou taviniraa: Te faaiteraa i te parau apî maitai ia vetahi ê ia maraa ia tatou, e riro ïa i te haamaitai-rahi-hia mai. (Mas. 3:27, 28) Te ueue rahi nei e rave rahi feia poro tei au ia haapopouhia, ma te faaaano i ta ratou taviniraa, ei hiˈoraa, ma te riro ei pionie tauturu aore ra tamau. E nehenehe tatou paatoa e ueue ma te faaherehere ore ia hoˈi maite faahou tatou e farerei i te taata atoa o tei anaanatae e ia pûpû atu i te hoê haapiiraa bibilia i te mau taime atoa e nehenehe ai. (Roma 12:11) Mai te peu e e haa tatou na roto i teie mau ravea taa ê, e faufaahia ta tatou taviniraa e e oaoa ˈtu â tatou.
3 Ta tatou tururaa i te mau faufaa a te Basileia: I to Paulo faahitiraa i te manaˈo ra e “ueue ma te faaherehere ore,” no nia ïa i te mau ô materia. (Kor. 2, 9:6, 7, 11, 13) I teie mahana, e nehenehe tatou e haa rahi no te paturu i te mau faufaa a te Basileia ma te horoa i ta tatou mau taoˈa e ia tatou iho: e tauturu i te paturaa i te mau Piha a te Basileia e te mau Piha tairururaa, e riro ei rima tauturu no te tamâ e no te atuatu i teie mau vahi haamoriraa, e e turu i te pae moni i te amuiraa no reira e te ohipa na te ao nei oia hoi te pororaa i te Basileia e te faariroraa i te taata ei pǐpǐ. No te mea te rave ra te taata taitahi i ta ˈna tuhaa, e oaoa tatou ia ite ia Iehova i te haamaitai-hope-raa i taua ohipa ra ta ˈna i faaue mai.—Mal. 3:10; Luka 6:38.
4 Te faaue maira te Parau a te Atua ‘ia hamani maitai, ia taoˈa i te ohipa maitatai, ia horoa haere, ia au i te [opere].’ I teie nei, te ite ra tatou e rave rahi haamaitairaa ia pee i taua faaitoitoraa ra. I te hoê â taime, ‘te haapue maite ra tatou i te maitai tumu no tatou iho no a muri atu, e no te ora [mau].’—Tim. 1, 6:18, 19; MN.