Te manaˈo anaanatae e tupu mai
1 I te ao atoa nei, ua faaite te mau utuafare Kerisetiano i to ratou anaanatae no te ripene video ra Les jeunes s’interrogent . . . Comment se faire de vrais amis? I te Hau Amui, ua faatia te hoê metua tane e i muri aˈe i te mataitairaa ˈtu, ua parahi to ˈna mau tamaiti, ma te feruriruri, no te mea ua roohia ratou i te mau tupuraa atoa i faataahia i roto. I Malawi, ua manaˈo te mau taeae e te mau tuahine apî e e au atoa te ripene video ia ratou, no te mea te faaruru ra ratou i taua atoa mau faaheporaa ra a to ratou mau hoa haapiiraa. I Heremani, teie te parau a te hoê metua tane: “E pahonoraa tera i ta ˈu mau pure.” Ua parau te hoê potii e: “Mauruuru i te haamanaˈoraa mai e te haapeapea mau ra Iehova no ˈu.” I Niu Zelani, ua faaite te hoê matahiapo e: “Ua faahoˈi mai te reira i te hoê o ta matou potii i nia i te eˈa o te ora.” Ua na ô te hoê vahine faaipoipo i muri aˈe i to ˈna mataitairaa ˈtu e: “E hinaaro mau â vau e ia mataitai te mau taurearea atoa i roto i te parau mau i taua ripene video ra e ia turaihia ratou ia faariro i te parau mau ei tapiraa na ratou iho!” E te mau utuafare e, no te aha e ore ai e mataitai faahou atu? Ua oti anaˈe, a paraparau amui i nia i te mau uiraa i muri nei.
2 Omuaraa parau: Eaha te hoa mau?—Mas. 18:24.
3 Te mau haafifiraa o te auhoaraa: E nafea ia faaruru i te moemoe? (Phil. 2:4) No te aha e titauhia ˈi ia imi outou i te haamaitai i to outou huru, e o vai te nehenehe e tauturu ia outou? Eaha te mau taime no te faahoa ˈtu ia vetahi ê, e ihea e itehia mai ai?—Kor. 2, 6:13.
4 Te auhoaraa e te Atua: E nafea ia faatupu i te mau taairaa e Iehova, e no te aha te reira e hoona ˈi? (Sal. 34:8) O vai te tauturu maitai aˈe ia outou ia haapaari i to outou auhoaraa e te Atua?
5 Te mau hoa auraa ore: Eaha te mau amuimuiraa iino? (Kor. 1, 15:33) E nafea te mau hoa auraa ore e aratai ai i te inoraa pae varua? Eaha ta te aamu bibilia o Dina e haapii ia outou?—Gen. 34:1, 2, 7, 19.
6 Te hoê aamu hamanihia no teie tau: No te aha Tara i pohe ai i te moemoe? E nafea oia i te faatiaraa i ta ˈna maitiraa e amuimui i te tahi mau taurearea e ere i te Kerisetiano? Ua tuu ratou ia ˈna i mua i teihea fifi? No te aha to ˈna na metua i ore ai i ite e te fifihia ra oia, e e nafea raua ia tauturu ia ˈna ia maitai mai oia i te pae varua? E nafea te hoê pionie i te riroraa mai ei hoa mau no Tara? No te aha te mau Kerisetiano e haapao maite ai i te Maseli 13:20 e te Ieremia 17:9 e tia ˈi? Eaha te haapiiraa faufaa ta Tara i huti mai?
7 Faaotiraa: Eaha te mau haapiiraa ta outou i huti mai no roto mai i taua ripene video ra? E nafea outou e faaohipa ˈi i te reira no te tauturu ia vetahi ê?—Sal. 71:17.