Ia opua papu i te ora ia au i te eˈa o Iehova
1 Ua riro te faaotiraa ta tatou i rave i roto i te oreraa parau hopea ei hoê o te mau taime oaoa roa ˈˈe o te tairururaa mataeinaa “E aratai te eˈa o te Atua i te ora.” Ua haamata oia mai teie: “Te [...] papu ra ia tatou e o te eˈa o te Atua te eˈa maitai roa ˈˈe.” E hiˈo mai tatou i te tahi mau tuhaa faufaa o teie nei faaotiraa ta tatou i pahono e “E.”
2 Ua faaoti tatou e faaea ma te viivii ore i mua ia Iehova, ma te porao ore e teie nei ao. E tamau â tatou i te tuu i te hinaaro o te Atua i te parahiraa matamua i roto i to tatou oraraa. Ma te faaohipa i ta ˈna ra Parau, te Bibilia, ei aratai, eita tatou e tioioi haere i te pae atau aore ra i te pae aui, e faaite ïa tatou e mea teitei aˈe te eˈa o te Atua i to teie nei ao.
3 Te patoi rahi nei te totaiete taata i te eˈa o te Atua e te amo ra o ˈna i te utua. (Ier. 10:23) E tia ïa ia tatou ia tamau noa i te vaiiho ia tatou e haapiihia e to tatou Taata haapii Rahi, o Iehova, o te na ǒ ra e: “Teie te eˈa: e na reira i te haere.” (Isa. 30:21) I roto i te mau tuhaa atoa, mea maitai roa ˈˈe te eˈa o Iehova tei faahitihia i roto i te mau Papai. No te pee i te reira, e tia ia tatou ia faaohipa maitai i te mau mea atoa ta Iehova e haapii mai ra ia tatou.
4 Te maitai-roa-raa o te haapiiraa a Iehova: Te haapii maira o Iehova ia tatou i te tapao mau o te oraraa e nafea ia ora ma te au roa ˈˈe. Te haapii atoa mai ra o ˈna ia tatou ia haamaitai i to tatou huru oraraa i te pae feruriraa, morare e varua, e ia vai noa tatou ma te hau e to tatou mau taeae, te mau melo o to tatou utuafare e to tatou mau taata-tupu. Te haapii maira o ˈna i te reira, na roto i te arai o ta ˈna ra buka, te Bibilia, e ta ˈna faanahonahoraa.
5 No reira, e tuhaa faufaa roa ïa to te mau putuputuraa a te amuiraa. Ia tae e ia apiti tatou i roto i na putuputuraa e pae, e fanaˈo ïa tatou i te hoê haamataroraa no te riro mai ei tavini no te parau apî maitai e te hoê haapiiraa faito noa no to tatou oraraa Kerisetiano. (Tim. 2, 3:16, 17) E faahope to tatou Taata haapii Rahi i ta tatou haapiiraa teotaratia i te mau tairururaa. E haamau anaˈe ïa i te hoê fa oia hoi eiaha roa ˈtu e mairi i te hoê noa ˈˈe putuputuraa aore tairururaa mai te peu e aita to tatou e maˈi aore ra e fifi.
6 E faaitoito anaˈe i te ora ia au i te eˈa o te Atua. Ia na reira tatou, e arue ïa tatou ia Iehova e e haamaitaihia tatou e a muri noa ˈtu!—Isa. 48:17.