Te haerea kerisetiano i te fare haapiiraa
1 Mai te peu e tei roto outou i te mau taurearea kerisetiano o te haere nei i te haapiiraa, te hinaaro nei outou i te hoê faaroo paari no te faaea noa ma te haapao maitai. Tei mua outou i te mau amuimuiraa iino e te mau tupuraa o te nehenehe e tamata i to outou faaroo. E mea faufaa e ia faaohipa outou i te aˈoraa a Petero oia hoi te faaite-noa-raa i ‘te hoê haerea maitai i rotopu i te mau etene, ia hiˈo râ ratou i ta outou parau maitai, ia haamaitai ratou i te Atua.’ (Petero 1, 2:12.) Te hinaaro nei outou i te itoito e te papu-maitai-raa no te faaruru i taua fifi ra.
2 I roto aore ra i rapaeau i te fare haapiiraa, te arohia nei outou e e rave rahi mau peu tia ore: te mau taatiraa i te pae tino hou te faaipoiporaa, te parau faufau, te avaava e te faaohiparaa i te mau raau taero. I te mau mahana tataitahi, te faaruru nei outou i te mau faahemaraa o te turai nei e ia viiviihia to outou haerea maitai. Mai te mau taata paari e tia ia outou “ia mârô maite atu i te faaroo” i mua i taua mau tamataraa ra.—Iuda 3; a hiˈo i Te Pare Tiairaa no te 15 no tiurai 1991, mau api 23-6 (farani).
3 I te fare haapiiraa te faatupuhia nei te mau oroa here aiˈa e te mau oroa no teie nei ao. Ua ite anei outou te tahi mau oroa here aiˈa e te faaroo o te faatupuhia nei i roto i ta outou fare haapiiraa? Mai te peu e tei roto outou i te hoê huru tupuraa atâta mau, e mau anei ia outou ‘te hoê aau hapa ore, ia haama ratou o tei pari haavare noa mai i to outou haerea maitai’?—Petero 1, 3:16.
4 E nehenehe outou e tamatahia e te anaanatae o te mau ohipa faaetaetaraa tino e te mau faanahoraa hau atu no te fare haapiiraa. E tia ia outou ia ite papu e nehenehe teie mau faanahoraa anaanatae mau ia hiˈo-matamua-hia e faaarepurepu i to outou faaroo. E mea titauhia e ia faaoti outou i te amuimui atu e te feia o ta outou e nehenehe e fanaˈo te hoê ‘mahanahana hoi i to ratou faaroo.’—Roma 1:12.
5 E nehenehe outou e faaoromai, maoti te tauturu a Iehova: Te tamau noa nei o Satani i te tamata i to outou nei faaroo. E nehenehe outou e faaoromai i te mau fifi rarahi mau, teie nei râ te mau haamaitairaa o ta outou e fanaˈo aita ïa e faaauraa (Petero 1, 1:6, 7). Eita outou iho e nehenehe e faaruru i teie nei mau tamataraa; a imi i te tauturu a Iehova. Ua faaue o Iesu i ta ˈna mau pǐpǐ e: “E ara e e pure hoi, ia ore outou ia roohia e te ati.” (Mat. 26:41). E faufaa rahi te faaiteraa i te aˈoraa ia ˈna iho e te hitahita ore.—Kor. 1, 9:27.
6 A haamanaˈo noa outou e e utua ta outou e faahoˈi ia Iehova no to outou haerea (Koh. 11:9). Noa ˈtu e aita e taata e hiˈopoa nei i ta outou mau ohipa, ua ite râ o Iehova eaha ta outou e rave ra e e haava mai o ˈna ia outou ia au i te reira (Heb. 4:13). E turai te hinaaro rotahi e ia auhia mai outou e ana ia “rave faaoti hua i to outou ora ma te mǎtaˈu e te rurutaina.” (Phil. 2:12.) Te taioraa i te Parau a te Atua i te mau mahana atoa o te hoê ïa tauturu rahi. E itehia te mau aˈoraa maitatai e te mau faahiˈoraa maitai roa te tia ia apeehia.—Heb. 12:1-3.
7 E te mau metua, e tuhaa rahi ta outou. E tia ia outou ia horoa i te aratairaa i ta outou mau tamarii, ia ite papu i to ratou mau fifi e te tautururaa ia ratou i te taime e hiaaihia ˈi. Te vai ra anei te hoê aparauraa maitai i rotopu ia outou e ta outou mau tamarii? Ua faaô maitai anei outou i roto ia ratou te taa-maitai-raa o te mau ture e te mau faaueraa tumu a te Atua? I mua i te mau tamataraa e te mau faahemaraa, e mea puai anei ta outou mau tamarii, aore ra te otohe oioi ra anei ratou? Te paruparu ra anei ratou no te mea hoi e tia ia ratou ia faataa ê mai i to ratou mau hoa haapiiraa? E te mau metua, tei ia outou te hopoia i te tautururaa ia ratou (Deut. 6:6, 7). Mai te peu e e faaî maitai outou i ta outou hopoia, e horoa ïa outou i te ravea i ta outou mau tamarii ia noaa te re i roto i te aroraa no te faaroo.—Mas. 22:6.