E faatupu tatou i tatou taviniraa ma te ore e hiˈo i te huru o te taata

¹ Ua parau o Petero e ‘aita te Atua e hiˈo i te huru o te taata, o te mǎtaˈu ra ia ˈna e o te rave i te parau-tia o te auhia ia e ana’. (Ohipa 10:34, 35.) I teie nei mahana, te faatupu nei tatou i ta tatou taviniraa ia au i teie parau mau faahiti-maramarama-hia. E tia ia tatou ia tutava no te haapaiuma i te mau haafifiraa o te haapeapea ia tatou ia faaite i te parau apî i te taata atoa.

² Ia poro tatou i tera e tera fare, te farerei nei tatou i te mau taata aita e taa ra i te reo e paraparauhia nei i roto i te amuiraa. E nehenehe te fifi o te reo e tapea i te hoê taata ia haafaufaa i te poroi o te Basileia. Te aparau nei te feia tariˈa turi maoti i te mau tapao. Nafea ia haapaiuma i te fifi o te reo e ia hohora ˈtu i te parau apî i te taata tataitahi ma te aravihi?

³ I teie avaˈe, te afai nei te Taiete i te mau amuiraa atoa te mau tabula oia hoi “Anaanatae tamau no te hoê reo ěê”. (S-70a.) Te horoa ra te faaohiparaa o taua mau tabula ra i te ravea i te mau taata reo ěê o te tuhaa fenua ia ite i te poroi o te Basileia i roto i to ratou reo (no te mau tariˈa turi, i roto i te reo aparaa rima).

⁴ Ia farerei tatou i te hoê taata tariˈa turi aore ra aita e taa ra i te reo paraparauhia i roto i te amuiraa, te anaanatae ra aore ra aita i te parau mau, e tia ia tatou ia faaî ma te taa maitai i te api parau S-70a. Noa ˈtu aita tatou i ite i to ˈna iˈoa, e faaite tatou i to ˈna vahi faaearaa e to ˈna reo. E horoahia te api parau i te Piha no te Basileia i roto i te afata faataahia no te mau tabula taviniraa. E ohi ïa te papai parau i te taatoaraa o te mau tabula, e hiˈopoa e ua faaîhia ma te tano e ma te taa maitai, e e afai atu ai i te mau amuiraa aore ra mau pûpû piri aˈe o te haapao ra i te mau reo faahitihia.

⁵ Mai te peu e, aita e amuiraa aore ra pûpû o te nehenehe e poro i roto i te reo hinaarohia, e nehenehe e ani i te hoê taata poro o te hoê amuiraa o te fenua o tei ite i taua reo ra, ia haere e farerei. Mai te peu e aita i itehia te hoê taata poro o te paraparau i taua reo ra, i muri iho atoa i te faaararaa i te papai parau, e tutava ïa te mau taeae o te amuiraa no te horoa i te faaiteraa i taua taata ra. E mea tano maitai te vea iti E oaoa oe i te fenua e a muri noa ˈtu! i roto i teie mau huru tupuraa.

⁶ I roto i te tahi mau tupuraa, e faaohipa-atoa-hia te mau api parau no te mau amuiraa farani e tahiti. Ei hiˈoraa, e au maitai te mau taata ta tatou e farerei nei i roto i te tuhaa fenua e o ta tatou i tauaparau, i roto i te hoê amuiraa reo ê. No reira, eita te feia poro e haamarirau i te faahaere i mua i te hoˈi-faahou-raa e farerei aore ra te haapiiraa bibilia maoti i te api parau S-70a.

⁷ E tia i te feia poro atoa ia ineine i te faaohipa i te hoê api parau “Anaanatae tamau” i te mau taime atoa e titauhia. Mai te peu e aita ta te amuiraa te mau api parau S-70a, e nehenehe e papai i te mau haamaramaramaraa anihia i nia i te hoê api parau e ia faahaerehia mai tei faataahia na mua ˈtu. Ia tutava tatou ma te haavare ore i te faaite i te parau apî i to tatou mau taata-tupu atoa, noa ˈtu eaha to ratou reo, e faaite tatou i te here o to tatou Atua, Iehova, “o tei hinaaro i te taata atoa ia ora, e ia noaa te ite i te parau mau”. — Tim. 1, 2:4.