Te haapiiraa faahiahia e huti mai i te reta Hebera huˈa roa ˈˈe

E nehenehe mau anei e tiaturi e tupu te mau parau fafau atoa a te Atua? Ua papu ia Iesu i te reira e na roto i ta ˈna haapiiraa, ua turai oia i te feia o tei faaroo atu ia tiaturi atoa. A hiˈo na i te faahiˈoraa ta ˈna i horoa i roto i te Aˈoraa i nia i te mouˈa. Ua papaihia te reira i roto i te Mataio 5:18 o te na ô ra: “Oia mau ta ˈu e parau atu: E mou te raˈi e te fenua, e ore râ te hoê reta huˈa roa ˈˈe o te ture a Mose aore ra te hoê tapao reta e mou e ia hope roa te mau mea atoa i papaihia i te tupu.”

Teie te reta huˈa roa ˈˈe o te piapa Hebera, י (yod). Tera atoa te reta matamua o te iˈoa moˈa o te Atua ra o Iehova.a Taa ê atu i te mau parau e reta o te Ture a te Atua, ua faariro te mau papai parau e Pharisea i te tahi noa ˈˈe “tapao reta” ei mea faufaa roa.

Ua parau Iesu e mou te raˈi e te fenua, area te tuhaa iti roa ˈˈe o te ture, e hope roa ïa i te tupu. Tera râ, te haapapu mai ra te Bibilia e vai te raˈi e te fenua ta tatou e ite nei e a muri noa ˈtu. (Salamo 78:69) Na roto i teie parau maere mau, ua hinaaro Iesu e faaite e tupu te tuhaa huˈa roa ˈˈe o te Ture a te Atua.

Mea faufaa anei no Iehova te mau tuhaa rii? Papu maitai. A hiˈo na, ua parauhia i te mau Iseraela eiaha te tahi noa ˈˈe ivi o te fanauˈa mamoe o te oroa Pasa ia fati ia ratou. (Exodo 12:46) Ua taa anei ia ratou te tumu o tera faaueraa? Aita paha. Area o Iehova, oia ïa. Noa ˈtu mea iti, e tuhaa faufaa roa te reira i roto i te mau parau tohu no nia i te Mesia. Te faaite ra hoi te reira eita te tahi noa ˈˈe ivi o te Mesia e ofatihia i nia i te pou haamauiuiraa.—Salamo 34:20; Ioane 19:31-33, 36.

Eaha ta te mau parau a Iesu e haapii mai ra? E nehenehe atoa tatou e tiaturi e tupu te mau mea atoa ta Iehova i fafau, tae roa atoa i roto i te tuhaa iti roa ˈˈe. E ere anei i te mea mahanahana mau? Auê te faahiahia te haapiiraa e huti mai i te reta Hebera huˈa roa ˈˈe!