No te aha ua tae roa mai ia tatou?

E nehenehe tatou e fanaˈo e e taio i te reira i teie mahana. Ia maiti oe i te tahi huriraa Bibilia maitai, ua papu ia oe o te mau papai tahito roa o te Parau a te Atua ta oe e taio ra.a No te aha râ te Bibilia i tae roa mai ai ia tatou noa ˈtu ua pê te mau otaro matamua, noa ˈtu te patoiraa rahi e te mau tamataraa a te taata no te taui i ta ˈna poroi? Mea maere mau te mau tupuraa ta te Bibilia i faaruru! Eaha te taa-ê-raa o tera buka?

E rave rahi feia haapii Bibilia o te tiaturi ra mai te aposetolo Paulo o tei papai: “Te mau parau moˈa atoa i papaihia ra e mea faaurua mai ïa e te Atua.” (Timoteo 2, 3:16) Ua papu ia ratou, ua tae roa mai te Bibilia ia tatou no te mea o te Parau a te Atua te reira e na ˈNa i vai ara ia fanaˈo tatou i teie mahana. Haamanaˈo na ia Faizal tei faahitihia i te tuhaa matamua o teie tumu parau. Ua faaoti o ˈna i te hiˈopoa ua tano anei to ˈna manaˈo no nia i te Bibilia. Ua haapii oia i te reira e ua maere roa i ta ˈna i ite. Ua taa ia ˈna i muri iho, aita i roto i te Bibilia te mau haapiiraa ta te Amuiraa faaroo Kerisetiano i haaparare. Ua putapû roa atoa oia i te ite i te opuaraa a te Atua no te fenua mai tei faaitehia i roto i ta ˈNa Parau.

Te na ô ra Faizal: “Ua papu ia ˈu i teie nei, e ô no ǒ mai i te Atua ta ˈu Bibilia. Ia feruri tatou, mai te peu e nehenehe ta te Atua e hamani i te ao nui, aita anei to ˈna e mana no te horoa mai e no te paruru i te hoê buka? Aita anaˈe, mai te huru te parau ra tatou mea iti te puai o te Atua Mana hope! O vai hoi au no te faahiti i te parau mai tera?”—Isaia 40:8.