TE PAHONO RA TE BIBILIA
E nehenehe anei e ite i te parau mau no nia i te Atua?
No te aha e hinaaro te atua ia ite tatou i te parau mau? a taio i te Ioane 17:3
Ua faaite te Atua i to ˈna manaˈo i te taata. Na roto i to ˈna varua moˈa, aore ra puai ohipa, ua tuu oia i to ˈna mau manaˈo i roto i te feruriraa o te feia i papai i te Bibilia. (Petero 2, 1:20, 21) E nehenehe tatou e ite i te parau mau no nia i te Atua ma te taio i te Bibilia.—A taio i te Ioane 17:17; Timoteo 2, 3:16.
E rave rahi ohipa ta te Atua i faaite no nia ia ˈna i roto i te Bibilia mai teie te huru: No te aha o ˈna i poiete ai i te taata? Eaha ta ˈna e rave no tatou? E eaha ta ˈna e titau mai ra? (Ohipa 17:24-27) Te hinaaro ra te Atua ra o Iehova ia ite tatou i te parau mau no nia ia ˈna.—A taio i te Timoteo 1, 2:3, 4.
No te aha te Atua e hinaaro ai i te feia e au i te parau mau?
E Atua parau mau o Iehova e ua tono mai oia i ta ˈna Tamaiti Iesu no te haapii i te parau mau i te huitaata. E pee ïa te feia e au i te parau mau ia Iesu. (Ioane 18:37) Te hinaaro ra te Atua ia riro tera mau taata ei feia haamori ia ˈna.—A taio i te Ioane 4:23, 24.
Ua haaparare te Diabolo ra o Satani i te mau haapiiraa hape ia ore e rave rahi taata ia ite o vai te Atua. (Korinetia 2, 4:3, 4) E haapao te feia e ore e au i te mea maitai i tera mau haapiiraa hape. (Roma 1:25) E mirioni râ taata aau tae te ite nei i te parau mau no nia i te Atua ma te haapii i te Bibilia.—A taio i te Ohipa 17:11.