TE PAHONO RA TE BIBILIA

E nehenehe anei e tiaturi i te tahi oraraa maitai aˈe i teie?

I roto i to ˈna oraraa, e hauti te taata, e rave i te ohipa, e faaipoipo, e fanau i te tamarii a ruau atu ai. E nehenehe anei e tiaturi i te tahi oraraa maitai aˈe i teie? (Ioba 14:1, 2) Te faaite ra te Bibilia ua hinaaro atoa te feia feruriraa paari mau i te pahonoraa o tera uiraa.—A taio i te Koheleta 2:11.

E tumu anei tatou i poietehia ˈi? E ui anaˈe na mua, ‘Na vai i hamani i te taata?’ Ma te hiˈopoa i te hamaniraa faahiahia o to tatou roro e tino, ua faaoti e rave rahi te vai ra te hoê Atua poiete paari. (A taio i te Salamo 139:14.) E tumu ïa o ˈna i hamani ai te taata! Ia ite tatou i te reira, e oaoa ˈtu â tatou i te oraraa nei.

No te aha te taata i hamanihia ˈi?

Ua haamaitai te Atua i na taata matamua e ua horoa ˈtu i te hoê ohipa au maitai. Ta ˈna opuaraa, ia î, ia riro te fenua ei paradaiso e ia ora raua e a muri noa ˈtu.—A taio i te Genese 1:28, 31.

Ua orure hau te taata e aita te reira i tupu. Aita râ oia i faarue ia tatou e aita atoa to ˈna hinaaro i taui. Te haapapu ra te Bibilia te haa ra te Atua no te faaora i te mau taata taiva ore e ia tupu ta ˈna opuaraa no te fenua! Te hinaaro ra ïa te Atua ia fanaˈo oe i te oraraa ta ˈna i manaˈo no te taata! (A taio i te Salamo 37:29.) A haapii i te Bibilia no te ite eaha te rave ia faufaahia oe i te opuaraa a te Atua.