Ta ˈu i faaoti i to ˈu tamariiraa!

I 1985, hoê ahuru to ˈu matahiti a haere mai ai te tahi mau tamarii no Cambodge i ta ˈu fare haapiiraa i Columbus, Ohio, Marite. Ma te tahi noa parau na roto i te reo Beretane e hohoˈa ta ˈna i papai, ua faatia mai te tahi tamaroa i te mau hamani-ino-raa, haapoheraa taata e horo-ê-raa riaria mau i to ratou fenua. I te po, e taˈi au i te manaˈo-noa-raa i tera mau tamarii. Ua tamata vau i te faataa i te tiaturiraa o te paradaiso e te tia-faahou-raa, aita râ ratou i taa i ta ˈu i parau atu. Noa ˈtu e tamarii noâ vau, ua faaoti au e haapii i te reo Cambodgien ia ite to ˈu mau hoa haapiiraa o vai Iehova. Aita vau i manaˈo noa ˈˈe e e taui roa to ˈu oraraa i tera faaotiraa!

E ere i te mea ohie ia haapii i te reo Cambodgien! E piti taime, ua manaˈo vau e taora i te tauera, ua tauturu mai râ Iehova na roto i to ˈu na metua. I muri aˈe, ua faaitoito mai to ˈu mau hoa e orometua i te tapi i te toroa aufau-maitai-hia. I hinaaro na râ vau e riro ei pionie, ua maiti ïa vau i te haapii i te tahi toroa ia noaa ta ˈu ohipa afa mahana. I muri aˈe i te tau haapiiraa, ua poro vau e te tahi mau pionie e ua haapii atoa ia vetahi ê i te reo Beretane. Ma te na reiraraa, ua faufaa-roa-hia vau i muri aˈe!

I te 16raa o to ˈu matahiti, ua faarooroo vau e te vai ra te hoê pǔpǔ na roto i te reo Cambodgien i te tahi amuiraa i Long Beach, Kalifonia, Marite. Ua turu vau i tera pǔpǔ e mea na reira to ˈu iteraa i te taio i te papai Cambodgien. I muri iti aˈe i te noaaraa mai ta ˈu parau tuite, ua riro vau ei pionie e ua tamau i te poro i te feia tapiri mai i to ˈu fare e paraparau ra i te Cambodgien. I te 18raa o to ˈu matahiti, ua manaˈo vau e reva i Cambodge. Noa ˈtu e e fenua atâta tera, ua taa ia ˈu e e mea tia ia ite na ahuru mirioni taata o tera fenua i te parau apî oaoa o te Basileia. I tera tau, hoê noa amuiraa e e 13 taata poro i reira. I te 19raa o to ˈu matahiti, ua reva vau i Cambodge e e piti matahiti i muri aˈe, ua faaoti e noho roa i reira. Ia nehenehe noa vau e poro, ua noaa mai ta ˈu ohipa afa mahana, te huriraa ïa na roto i te reo Beretane e te haapiiraa ia vetahi ê i tera reo! I muri aˈe, ua itea ia ˈu i te tahi hoa faaipoipo e tapi atoa ra i te hoê â fa mai ia ˈu. Ua oaoa mâua i te tauturu e rave rahi taata i Cambodge ia riro ei Ite no Iehova.

Ua horoa mai Iehova i ‘ta to ˈu aau e hinaaro ra.’ (Sal. 37:4) O te pororaa te toroa faahiahia e oaoa roa ˈˈe! E 16 matahiti i teie nei to ˈu oraraa i Cambodge. Na mua ˈˈe, e 13 noa taata poro, i teie nei râ, e 12 ïa amuiraa e e 4 pǔpǔ taata poro ta Iehova!—Faatiaraa a Jason Blackwell.