Te tara o te pohe

E ere i te mea ohie ia tauaparau no nia i te pohe e eita atoa e rave rahi e hinaaro ia faahitihia te reira. Ia tae râ i te hoê mahana, e faaruru iho â tatou i tera ati. Ia puta tatou i te tara o te pohe, e mea mauiui roa.

Eita iho â tatou e ineine roa ia pohe te hoê metua, hoa faaipoipo aore ra tamarii. Ia tupu taue mai aore ra eita, e mauiui iho â tatou. I muri aˈe, o te hepohepo te itehia.

A pohe ai to ˈna metua tane i muri aˈe i te hoê ati purumu, te na ô ra Antonio: “E au e ua ponao te tahi taata i te opani o to oe fare e ua haere e te taviri. Eita oe e nehenehe e tomo i roto noa ˈtu e maa taime iti noa. I teie nei, e manaˈonaˈo noa ïa oe ia ˈna, tirara ˈtu ai. Noa ˈtu e eita oe e farii e e mea tia ore tei tupu, eita e nehenehe e taui i te reira.”

E 47 matahiti to Dorothy a pohe ai ta ˈna tane. Ua hinaaro oia e ite i te pahonoraa o te tahi mau uiraa. Ei orometua haapiiraa Tapati, aita oia i tiaturi o te pohe te hopea o te mau mea atoa. Aita râ o ˈna i papu eaha te tupu mau i muri aˈe i te pohe. Tera te uiraa ta ˈna i ani i te orometua o ta ˈna ekalesia no Beretane tei pahono atu: “Aita hoê aˈe taata i taa i te reira, na oe iho â e ite atu.”

Mai tera noa iho â ïa? Aita anei e ravea no te ite e o te pohe anei te hopea o te mau mea atoa?