UIRAA A TE FEIA TAIO

Ia au i te Ioane 11:35, ua oto Iesu hou a faahoˈi mai ai ia Lazaro i te ora. No te aha?

Ia pohe tei herehia, e taˈi iho â tatou. E mihi hoi tatou ia ˈna. Ua here Iesu ia Lazaro. Aita râ o ˈna i oto no te mea ua pohe oia. No to ˈna râ aumihi i te utuafare e hoa o Lazaro. Ta te mau irava tapiri ïa o te faatiaraa a Ioane e faaite maira.—Ioa. 11:36.

A faaroo ai Iesu e ua maˈihia to ˈna hoa ra o Lazaro, aita Iesu i haere oioi e faaora ia ˈna. Te na ô ra te faatiaraa: “Ite aˈera [Iesu] e ua pohe [Lazaro] i te maˈi, parahi ihora Iesu i taua vahi ra e rui piti.” (Ioa. 11:6) No te aha Iesu i haamaoro ai? Ua na ô oia: “E ore te reira maˈi e riro ei maˈi pohe, ia haamaitaihia râ te Atua, e ia haamaitaihia hoi te Tamaiti a te Atua i te reira.” (Ioa. 11:4) Ua hinaaro ïa Iesu e faaohipa i te pohe o Lazaro ‘ia haamaitaihia te Atua.’ E nafea? E rave Iesu i te hoê semeio faahiahia mau ma te faahoˈi mai i to ˈna hoa here i te ora.

A tauaparau ai i ta ˈna mau pǐpǐ, ua faaau Iesu i te pohe i te taoto. No reira o ˈna i parau ai ia ratou e ‘te haere nei oia e faaara’ ia Lazaro. (Ioa. 11:11) No Iesu, e au te faahoˈiraa mai ia Lazaro i te ora i te faaararaa i te hoê taata e taoto ra. Aita ïa e faufaa ia oto o ˈna i te pohe o to ˈna hoa.

No te aha ïa Iesu i oto ai? E hiˈo anaˈe ïa i te mau irava tapiri. A ite ai i to Lazaro tuahine ra o Maria e ia vetahi ê ia oto, “uuru ihora [Iesu] e horuhoru atura.” Ua “uuru” roa o ˈna a ite ai i to ratou mauiui. Ua oto mau Iesu a ite ai i te mauiui o to ˈna mau hoa here.—Ioa. 11:33, 35.

Eaha ta teie faatiaraa e faaite maira? E mana to Iesu no te faahoˈi mai i to tatou feia herehia i te ora e te ea maitai i roto i te ao apî i mua nei. Ua aumihi Iesu i te feia ua pohe tei herehia. Ia aumihi atoa ïa tatou i te feia e oto ra i te pohe o tei herehia e ratou e tia ˈi.

Ua ite Iesu e e faahoˈi mai o ˈna ia Lazaro i te ora. Ua oto o ˈna no to ˈna here e aumihi i to ˈna mau hoa. Ia turai atoa mai to tatou aumihi ia ‘oto e te feia e oto ra.’ (Roma 12:15) Aita te reira e faaite ra e te ere nei tatou i te faaroo i te tiaturiraa o te tia-faahou-raa. A hiˈo na ia Iesu, ua ite o ˈna e e faahoˈi mai o ˈna ia Lazaro i te ora. Noa ˈtu râ, ua faaite o ˈna i to ˈna aumihi i te feia e oto ra ma te oto atoa e o ratou.