Na te feia taio
Ua haamata te piaraa o teie vea i Tiurai 1879. Mai reira mai, ua taui te mau ravea, teie atoa ïa vea. (A hiˈo i te mau hohoˈa i nia.) Mai teie atu Pare Tiairaa, e ite outou i te tahi mau tauiraa no nia i te rahi o te api. Eaha tei taa ê?
I te fenua e rave rahi, te rave nei te rahiraa o te taata i te maimiraa i nia i te Internet e mea au na ratou teie ravea. Ma te tahi noa pataraa e noaa ˈi te mau haamaramaramaraa. E nehenehe atoa e rave rahi buka e vea e taiohia.
Ma te feruri i teie ravea apî, ua rave matou i te tahi mau tauiuiraa aita i maoro aˈenei i nia i ta tatou reni Internet www.jw.org ia anaanatae atu â te taata e no te faaohie i te maimiraa. E nehenehe te feia e haere atu i nia i ta tatou reni e taio i te mau papai na roto e 430 tiahapa reo. Mai teie atu râ avaˈe, e nehenehe atoa ratou e taio i te mau tumu parau matauhia o ta tatou mau vea neneihia e ite-noa-hia i teie nei i nia i ta tatou reni Internet.a
E piahia ˈtu e rave rahi tumu parau i nia i tera reni. Mai teie vea ˈtu, e iti mai ïa te api o Te Pare Tiairaa. E ere faahou e 32 api, 16 râ. Te pia-ê-na-hia ra tera vea na roto e 204 reo. No te iti o te mau api, e nehenehe atura teie vea e hurihia na roto e rave rahi atu â reo.b
Te tiaturi nei matou e e tauturu mai tera mau tauiuiraa ia porohia ˈtu â te poroi faaora o te Bibilia i te taata e rave rahi. Ua faaoti papu matou e tamau noa i te horoa i te haapiiraa faufaa ma te ohie e te anaanatae na roto i na ravea e piti nei, te vea neneihia e te reni Internet. E fanaˈo ïa te feia taio e haafaufaa ra i te Bibilia i ta te reira e haapii mau ra.
Te feia i pia i teie vea
a Teie te tahi mau tumu parau e ite-noa-hia i teie nei i nia i te Internet: “No te feia apî,” ua rau te tumu parau i roto o te tauturu ia ratou ia haapii i te Bibilia e “Ta ˈu mau haapiiraa Bibilia,” te hoê anairaa tumu parau ta te mau metua e faaohipa e ta ratou tamarii e toru matahiti aore ra iti aˈe. (Aita teie na tuhaa na roto i te reo Tahiti.)
b Teie te tahi mau tauiraa o Te Pare Tiairaa reo Tahiti: I te mau piti avaˈe atoa, e matara mai hoê vea 16 api na te taatoaraa. E tamau â te neneiraa o te vea o te 15 o te avaˈe e 32 api ta te mau Ite no Iehova e faaohipa nei i ta ratou mau putuputuraa. E nehenehe te taata atoa e apiti atu i te reira.