Ta te mau vahine e faaruru ra

TE FAAITE nei te mau parau a teie tamahine i te pae atau i to tatou nei oraraa peapea: na te ao atoa, te hamani-ino-hia ra e te hiˈo-ino-hia ra te mau tamahine e te mau vahine. Teie te tahi hiˈoraa:

• Te hiˈo-ino-raa. I Asia, mea au aˈe na te rahiraa o te mau metua te tamaroa i te tamahine. Ia au i te hoê parau faataa a te Nunaa Amui i 2011, no te haamarua tamarii, te haapoheraa i te tamarii e no te haapao ore, te ere nei tera tuhaa fenua fatata 134 mirioni vahine.

• Te haapiiraa. Na te ao, i nia e toru taata tei ore i haere i te haapiiraa aore ra tei ore i naea e maha matahiti haapiiraa, e vahine e e tamahine e piti o ratou.

• Te faaheporaa e taati. Ua hau atu i te 2,6 miria vahine te ora ra i te mau fenua e ere â te faaheporaa e taati i roto i te faaipoiporaa i te ohipa ino.

• Te ea. I te mau fenua ravai ore, te pohe nei te hoê vahine fatata i te mau piti minuti atoa no te mau fifi i fa mai a hapû ai aore ra a fanau ai oia no te mea aita e ravea rapaauraa matamua.

• Te mau faufaa. Noa ˈtu e na te vahine e haapao ra i te afaraa o te mau faaapu na te ao, i te fenua e rave rahi, aita to ratou e tiaraa i mua i te ture no te fanaˈo i te faufaa aore ra i te hoê tuhaa fenua.

No te aha te mau vahine i ere ai i taua mau tiaraa tumu ra? Te pee ra te tahi mau taˈere i te mau haapiiraa e peu i te pae faaroo o te faaitoito ra aore ra o te faatia ra e ia maferahia e ia hamani-ino-hia te mau vahine. Ia au i te hoê vea reo Farani, ua parau te hoê vahine paruru Initia o Chandra Rami Chopra te iˈoa e te turu nei te mau ture atoa i te pae faaroo i te hiˈo-ino-raa i te mau vahine.

Hoê â anei to oe manaˈo? No oe, te faahaehaa ra anei te Bibilia i te vahine mai te tahi atu mau buka faaroo? No vetahi, e au ra e te na reira ra te tahi mau irava Bibilia. Eaha mau râ te manaˈo o te Atua i te vahine? Noa ˈtu e e tumu parau fifi teie i te pae aau, e hiˈopoa maite anaˈe ma te haavare ore i ta te Bibilia e parau ra, e ite ïa tatou i te pahonoraa.