E piˈo mai oe i raro i nia ia ˈu

E HURU maitai au mau te haehaa. E piri iho â tatou i te feia haehaa. Mea fifi roa râ ia ite i te haehaa mau i roto i teie nei ao, i nia iho â râ i te taata e mana to ratou. E te Atua ra o Iehova, te Ihotaata puai roa ˈˈe o te ao taatoa, mea haehaa anei oia? E hiˈopoa anaˈe i te mau parau a te peropheta Ieremia i roto i Te oto o Ieremia 3:20, 21 (Traduction du monde nouveau): “E haamanaˈo mau â oe e e piˈo mai i raro i nia ia ˈu; teie râ ta tau aau e manaˈo nei, e teie nei, e tiaturiraa to ˈu nei.”

Ua papai Ieremia i te buka Oto i te hoê taime peapea roa o te aamu o Iseraela. Ua mauiui roa o ˈna. Ua ite noa ˈtura hoi o ˈna i te haamouraahia to ˈna oire here ra o Ierusalema e to Babulonia. Noa ˈtu to ˈna ahoaho, ua ite te peropheta e e faatupuraa noa teie ati o te haavaraa a Iehova i nia i te mau Iseraela no to ratou haerea tia ore. Aita anei e tiaturiraa faahou to Ieremia? Ua manaˈo anei oia e mea atea roa Iehova no te haapao i tei tatarahapa e no te faatia mai ia ratou i to ratou hepohepo? A faaroo na i ta Ieremia mau parau ei tia no te nunaa.

Noa ˈtu te oto e haaati ra ia ˈna, mea papu to Ieremia tiaturiraa. Te tiaoro ra oia ia Iehova: “E haamanaˈo mau â oea e e piˈo mai i raro i nia ia ˈu.” (Irava 20) Aita Ieremia e feaa ra. Ua ite oia e eita Iehova e haamoe ia ˈna aore ra i te feia o to ˈNa nunaa tei tatarahapa. Eaha ïa ta te Atua mana hope e rave?—Apokalupo 15:3.

Ua papu ia Ieremia e e ‘piˈo mai Iehova i raro’ i nia i te feia e tatarahapa mau ra. E tauturu mai teie mau parau ia hiˈo ia Iehova mai te hoê Atua mǎrû. E au ra e e piˈo mai Iehova, “tei Teitei i te fenua atoa nei,” i raro e e faatia mai oia i ta ˈna mau tavini i to ratou tupuraa ino ia fanaˈo faahou ratou i ta ˈna farii maitai. (Salamo 83:18) Ua tapea maite Ieremia i tera tiaturiraa e ua itea ia ˈna te tamahanahanaraa mau no te mauiui e vai ra i roto i to ˈna aau. Ua faaoti papu te peropheta taiva ore e tiaturi noa e tae roa ˈi i te taime ta Iehova i maiti no te faaora i to ˈNa nunaa tatarahapa.—Irava 21.

E piti haapiiraa faufaa ta tatou e nehenehe e huti mai no nia ia Iehova i te mau parau a Ieremia. A tahi, mea haehaa oia. (Salamo 18:35) Noa ˈtu e ‘aore e faito to to ˈna mana,’ ua ineine Iehova i te faahaehaa ia ˈna no te tauturu ia tatou ia hepohepo tatou. (Ioba 37:23; Salamo 113:5-7) E ere anei te reira i te mea mahanahana? Te piti, e Atua aroha hamani maitai o Iehova; ‘ua tia ia ˈna ia faaore i te hara’ a te feia tatarahapa e ia horoa faahou atu i ta ˈna farii maitai. (Salamo 86:5) Aita e nehenehe e faataa ê i teie na huru maitatai: te haehaa e te aroha hamani maitai.

Auê tatou i te mauruuru rahi ia Iehova e e ere oia mai te mau tia faatere taata! Mea etaeta hoi ratou e aita e tâuˈa maira ia tatou. Te hinaaro ra anei oe e ite hau atu â no nia i te Atua haehaa o tei ineine i te piˈo mai i raro no te faatia mai i ta ˈna mau tavini aita anaˈe to ratou e tiaturiraa faahou?

Taioraa Bibilia no Tiunu:

◼ Ieremia 51-52; Oto o Ieremia 1-5–Ezekiela 1-5

[Nota i raro i te api]

[Parau iti faaôhia i te api 32]

Ua ineine Iehova i te faahaehaa ia ˈna no te tauturu ia tatou ia hepohepo tatou