Ua ite anei outou?

Mai te aha te rahi o te mau paturaa a Nebukanesa?

▪ I roto i te Daniela 4:30, ua parau Nebukanesa arii no Babulonia i tahito ra: “E ere anei teie o Babulonia rahi, i patuhia e au nei ei parahiraa arii no ˈu i te mana o to ˈu nei puai, e ia tura ˈtu vau o te arii nei?” Tera iho â anei?

Ia au i te tahi mau taata tuatapapa, ua hamani Nebukanesa i te mau hiero, te mau aorai, te patu e ati aˈe i te oire e te hoê aua nehenehe. Te hiero rahi i ropu ia Babulonia, e pare ïa e 70 tiahapa metera i te teitei. Te faahiti ra râ te hoê buka e piti ohipa tuiroo roa ˈˈe ta Nebukanesa i hamani, te Aroâ haereraa moˈa e te Uputa o te ruahine Ishtar. E hohoˈa liona to nia iho i te patu o na pae e piti o te Aroâ o te na roto atu i te Uputa o Ishtar, te tomoraa rahi o te oire. E piriti anaana ninamu paˈo to nia iho i te uputa e e rave rahi atoa hohoˈa puaatoro oni e te teni. E puta roa ïa tera hohoˈa i roto i te feruriraa o te hoê ratere e tomo i te oire pu i tahito ra.—Babylon—City of Wonders.

I te omuaraa o te senekele 20, ua itea mai e te tahi mau ihipǎpǎ e rave rahi huˈahuˈa e ua hamani faahou i te Aroâ haereraa moˈa e te Uputa o Ishtar i Pergamon-Museum, Berlin, Heremani.