Parau tohu 2. Oˈe

“E [tupu] te oˈe.”—MAREKO 13:8.

● Te imi ra te hoê taata i te haapuraa i te oire iti no Quaratadji, i Niger. Ua horo atoa ˈtu to ˈna mau fetii e teina no te tahi atu mau tuhaa oire i reira no te ora mai i te oˈe. Te tarava nei râ taua taata ra o ˈna anaˈe i nia i te hoê peue i nia i te repo. No te aha o ˈna anaˈe? “Aita oia e nehenehe e faatamaa i to ˈna utuafare e e hiˈo mata roa ˈtu ia ratou,” ta Sidi ïa, te raatira o te oire iti, i parau.

TA TATOU E ITE NEI. Na te ao nei, fatata 1 taata i nia i te 7 aita e navai ra i te maa i te mahana taitahi. Mea ino roa ˈtu i te mau fenua Afirika i raro mai i te Sahara, 1 ïa taata i nia i te 3 i te hoê area tau roa. No te taa i te reira, a feruri na i te hoê utuafare: te papa, te mama e te hoê aiû. Mai te peu e e navai noa te maa no e piti anaˈe, o vai te pohe i te poia? Te papa? Te mama? Te aiû? Tera te haapeapearaa a taua mau utuafare ra i te mau mahana atoa.

TEI FAAROO-PINEPINE-HIA. E navai roa te maa ta te fenua e horoa ra no te taata atoa. E titau-noa-hia ia faanaho-maitai-aˈe-hia te reira.

UA TANO ANEI TEI PARAUHIA? Parau mau, mea rahi aˈe te maa ta te feia faaapu e faatupu e e hapono nei i na mua aˈenei. I te tanoraa mau, e titauhia ia faanaho te mau faatereraa taata i te maa hau no te faaore i te oˈe. Noa ˈtu â râ e rave rahi matahiti tamataraa, aitâ i tia ia ratou.

EAHA TO OE MANAˈO? Te tupu ra anei te Mareko 13:8? Noa ˈtu te mau ravea apî, te roohia ra anei te huitaata i te oˈe na te ao atoa?

E pinepine te aueueraa fenua e te oˈe i te na mua mai i te mau fifi e tupu no te tahi atu tuhaa o te tapao o te anotau hopea.

[Parau iti faaôhia i te api 5]

“Ua hau atu i te hoê tamarii i nia i te toru te pohe ra i te maˈi mahaha, te maˈi hî e te tahi atu â maˈi te nehenehe e ora mai ahani ua navai ta ratou maa.”—ANN VENEMAN, FAATERE RAHI TAHITO O TE MAU FAUFAA A TE HAU AMUI NA TE MAU TAMARII.

[Faaiteraa i te fatu o te hohoˈa i te api 5]

© Paul Lowe/Panos Pictures