Pure

1 No te aha?

PURE. Tau tumu parau Bibilia noa te faatupu rahi ra i te anaanatae e te maere. E rave anaˈe na uiraa rahi e hitu no nia i te pure; e i muri iho, e hiˈopoa anaˈe i te mau pahonoraa i roto i te Bibilia. Ua faaineinehia teie mau tumu parau no te tauturu ia oe ia haamata aore ra ia haamaitai atu â i ta oe pure.

NA TE ao atoa nei, te pure ra te mau taata o te mau taˈere e haapaoraa atoa. Te pure ra ratou ratou anaˈe aore ra ei pǔpǔ, i roto i ta ratou iho mau fare pure mai te mau hiero, sunago e te vai ra ˈtu â. Te faaohipa ra paha ratou i te mau vauvau, korona, vairaa pure, hohoˈa moˈa, buka aore ra iri pure.

No nia i te pure, te taa ê ra te taata i te mau mea ora atoa o te fenua. Parau mau, e rave rahi to tatou tuearaa e to te animara. Mai ia ratou, e hiaai tatou i te maa, te mataˈi, e te pape. Mai ia ratou, ua fanauhia atoa tatou, e ora, e e pohe. (Koheleta 3:19) O te taata anaˈe râ te pure. No te aha?

Teie paha te pahonoraa ohie roa ˈˈe, mea faufaa te reira no tatou. Inaha, no te taata, e ravea te pure e raea ˈi te ao varua, te tahi mea moˈa, e te faufaa roa. Te faaite ra te Bibilia e ua poietehia tatou e teie mau hiaai. (Koheleta 3:11) I parau na hoi Iesu Mesia: “E ao to tei [ite i to ratou veve i te pae varua].”—Mataio 5:3, MN.

Te “veve i te pae varua”—e nafea ˈtu â ia faataa i te taatoaraa o tera mau fare e taoˈa haamoriraa, te rahiraa hora atoa i te pure-noa-raa? Parau mau, te tiaturi ra vetahi ia ratou iho aore ra i to ratou taata-tupu no te haamâha i to ratou mau hinaaro i te pae varua. Ia manaˈo oe, e puai anei to te taata no te tauturu maitai atu? E mea paruparu hoi tatou, aore e pue mahana, e te ite ore. Hoê anaˈe tei paari aˈe, tei puai aˈe, tei faaoromai aˈe ia tatou. E nehenehe oia e horoa mai i te mau mea ta tatou e hinaaro. Eaha hoi tera mau hinaaro i te pae varua e turai ra ia tatou ia pure?

A feruri na: aita anei oe i imi na i te aratairaa, te paari, aore ra i te mau pahonoraa i te mau uiraa i hau ê i te ite taata ia hiˈohia? Aita anei oe i hinaaro na i te tamahanahanaraa i te faarueraa mai te hoê taata herehia, i te aratairaa i mua i te hoê faaotiraa peapea mau, aore ra i te faaoreraa hara ia teimaha roa oe i te reira?

Ia au i te Bibilia, e tumu papu anaˈe tera no te pure. O te Bibilia te buka tiaturi-roa ˈˈe-hia no nia i tera tumu parau, e to roto te mau pure a te tane e vahine haapao maitai e rave rahi. Ua pure ratou ia tamahanahanahia ratou, ia arataihia, ia faaorehia ta ratou hara, e ia pahonohia mai ta ratou mau uiraa fifi roa ˈˈe.—Salamo 23:3; 71:21; Daniela 9:4, 5, 19; Habakuka 1:3.

Noa ˈtu te rau o tera mau pure, e taairaa râ to te reira. Ia pahonohia te pure taitahi, te vai ra te hoê tuhaa faufaa roa i roto, tuhaa tei moe na aore ra tei tâuˈa-ore-hia e teie nei ao. Ua ite hoi ratou o vai ta ratou e pure e tia ˈi.