E haafatata ˈtu i te Atua

Ua ho mai oia i te tiamâraa e maiti

TE MAU ARII 2, 18:1-7

EI HIˈORAA maitai to te mau metua no ta ratou mau tamarii e tia ˈi. E tauturu te reira i te hoê tamarii ia faatupu i te mau huru maitatai au mau e ia rave i te mau maitiraa paari i roto i te oraraa. Te mea peapea râ, aita e rave rahi metua e na reira ra. Te auraa anei ïa e aita e ravea no teie mau tamarii? Tei roto te pahonoraa i teie mau parau tamahanahana mau: ua ho mai te Atua ra o Iehova na tatou taitahi i te ô o te tiamâraa e maiti. A hiˈo na i te tupuraa o Hezekia i roto i Te mau arii 2, 18:1-7.

E tamaiti Hezekia a “Ahaza arii no Iuda.” (Irava 1) Ua faafariu ê Ahaza i to ˈna mau taata i te haamoriraa viivii ore a Iehova no te pee ia Baala e ta ˈna mau peu faatusiaraa taata. Ua haapohe atoa oia i te tahi mau taeae o Hezekia. Ua opani Ahaza i te mau uputa o te hiero e ‘ua hamani i te fata na ˈna iho i te mau poro aroâ i Ierusalema. Ua faariri atura oia ia Iehova.’ (Paraleipomeno 2, 28:3, 24, 25) E metua tane ino mau to Hezekia. Ua pee anei râ oia i te haerea ino o to ˈna metua?

I to Hezekia ariiraa mai, ua faaite oioi oia e eita oia e pee i te hiˈoraa ino mau o to ˈna metua tane. “Ua rave [Hezekia] i te parau tia i te aro o Iehova.” (Irava 3) Ua tiaturi oia ia Iehova e “aor[e] hoi o ˈna e faito i muri aˈe ia ˈna, i te mau arii atoa o Iuda.” (Irava 5) I te matahiti matamua o to ˈna ariiraa, ua aro teie arii apî no te haamoriraa mau ma te faaore i te mau vahi teitei, i reira i haamorihia ˈi te mau idolo. Ua iriti-faahou-hia te hiero e ua haamauhia â te haamoriraa viivii ore. (Irava 4; Paraleipomeno 2, 29:1-3, 27-31) ‘Ua ati maite Hezekia ia Iehova e ua au maira Iehova ia ˈna.’—Irava 6, 7.

Eaha tei tauturu ia Hezekia ia ore ia pee i te hiˈoraa ino o to ˈna metua tane? Ua ohipa maitai anei to ˈna metua vahine o Abia, aita rea hoi parau to ˈna, i nia ia ˈna? Ua ohipa atoa anei te hiˈoraa maitai o Isaia, tei haamata ei peropheta hou Hezekia a fanauhia ˈi, i nia i teie tamaiti hui arii apî?a Aita te Bibilia e parau ra. Noa ˈtu râ, te mea papu: ua maiti Hezekia e tapi i te hoê huru oraraa tei taa ê roa i to to ˈna metua tane.

E mea faaitoito te hiˈoraa o Hezekia no te feia atoa tei faaruru i te hoê tamariiriiraa fifi no te hiˈoraa ino o to ratou mau metua. Eita e nehenehe e taui e e faaore i ta tatou i ora na. E ravea râ ta tatou. E aratai te mau maitiraa ta tatou e rave i teie nei i te hoê oraraa oaoa no a muri aˈe. Mai ia Hezekia, e nehenehe tatou e maiti e here e e haamori i te Atua mau ra o Iehova. E ite ïa tatou i te hoê oraraa mauruuru i teie nei e i te ora mure ore i roto i te ao apî a te Atua. (Petero 2, 3:13; Apokalupo 21:3, 4) Auê tatou i te mauruuru i te Atua î i te here tei ho mai na tatou taitahi i te ô faufaa roa ˈˈe: te tiamâraa e maiti!

[Nota i raro i te api]