Ua ite anei outou?

I te tau o te aposetolo Paulo, no te aha mea atâta roa ˈi ia fano i te tahi mau avaˈe o te matahiti?

▪ No te mataˈi rahi, ua fano maoro te pahi tei nia iho te aposetolo Paulo na tua ˈtu ia Asia Iti. I te tahi vahi, ia au i te faatiaraa Bibilia, mea ‘mǎtaˈutaˈu ia fano, ua oti hoi te haapaeraa’ maa o te Mahana Taraehara. Ua parau Paulo i to ˈna mau hoa ratere e ia onoono noa ˈtu ratou i te tere, e pau rahi ‘te taoˈa e te pahi, e ati rahi atoa râ to ratou.’—Ohipa 27:4-10.

E tupu te haapaeraa maa o te Mahana Taraehara i te hopea Tetepa aore ra i te omuaraa Atopa. Ua ite te mau ihitai Roma e mea maitai te tere mai te 27 no Me e tae atu i te 14 no Tetepa. Mea atâta te tere mai te 14 no Tetepa e tae atu i te 11 no Novema, e e opanihia te tere mai te 11 no Novema e tae atu i te 10 no Mati. O te tauiuiraa te huru o te reva te hoê tumu, ia au i ta Paulo faataa-maitai-raa i ta ˈna i faaû. (Ohipa 27:13-44) E faaû te mau ihitai i te mau vero uˈana, a fifi roa ˈtu ai ia fano. E haapoiri te ata i te mahana i te ao e te mau fetia i te po. No te rupehu e te ûa, mea fifi roa ia ite maitai i te mau mea atâta.