Te parau mau no nia i te raˈi

AUÊ te au ia haere i nia i te raˈi e! Te turu ra te mau Mahometa, Hindous, Bouddhistes, te Amuiraa faaroo Kerisetiano, e e rave rahi atoa tei ore hoi e anaanatae i te haapaoraa, i te tahi tiaturiraa o te oraraa i muri aˈe i te pohe. E pinepine te raˈi i te hiˈohia mai te hoê vahi nehenehe e te au, i reira te taata e tiamâ ˈi i te mauiui e e tahoê faahou ai i “te feia herehia tei pohe.” No reira, no te rahiraa, e parau mau teie: E hinaaro te taatoaraa e haere i nia i te raˈi, eita râ hoê aˈe e hinaaro e pohe no te haere i reira. No te aha hoi?

Ahiri e haere tatou i nia i te raˈi ua pohe anaˈe, eita anei te taata e tiai ru i te pohe mai te hoê tamarii e tiai ru ra i te paari mai, e te hoê taata apî i te faaipoipo? Eita râ te rahiraa o te taata e hinaaro e pohe.

Noa ˈtu râ, te parau ra te mau tia haapaoraa e i muri aˈe i to tatou noho-poto-raa i te fenua nei, i te raˈi tatou e ora ˈi. A hiˈo na i ta te karadino Theodore Edgar McCarrick, arii epikopo faaturahia no Washington, e na ô ra: “E ere teie oraraa no tatou. No te raˈi tatou.” Hoê â atoa no te hoê peretiteni tahito o te Taatiraa o te feia poro evanelia no Marite: “Te fa o te oraraa, o te faahanahanaraa ïa i te Atua e te haereraa i nia i te raˈi . . . no te mea tei te raˈi to tatou nohoraa.”

Te niu ra te feia e tiaturi ra i te hoê oraraa no a muri aˈe i te raˈi i to ratou faaroo i nia i te tahi maa haamaramaramaraa noa. Ua itea ia George Barna, peretiteni o te hoê taiete titorotoro i te mau manaˈo faaroo, e e rave rahi taata “te hiˈo ra i to ratou oraraa nei e tera no a muri aˈe ia au i tei itehia ra i roto i te mau hohoˈa teata, upaupa, e aamu herehere.” Ua parau te hoê orometua épiscopalien no Floride: “Aita tatou i ite i te hoê aˈe mea no nia i te raˈi maori râ e tei te raˈi te Atua.”

E tumu parau faufaa roa râ te raˈi i roto i te Bibilia. Ia au i te Parau a te Atua, mai te aha te raˈi? Ua poietehia anei te taata no te ora i te raˈi? Ahiri e haere te taata i nia i te raˈi, eaha ta ratou ohipa i reira?

[Parau iti faaôhia i te api 3]

No te aha e rave rahi e hinaaro ai e haere i nia i te raˈi, e mea iti râ te hinaaro e pohe no te haere i reira?