Hoê hapaina toe!

UA HAAMATA Allen i te inu hua i te ava a 11 matahiti ai to ˈna.a Te hauti ra oia e to ˈna mau hoa i roto i te uru raau mai te mau taata i roto i te teata. E feia hauti noa tera, area te ava ta Allen e ta to ˈna mau hoa i inu, e ava mau ïa.

E 40 matahiti to Tony a inu riirii ai oia e pae aore ra e ono hapaina i te ahiahi, eiaha faahou râ hoê aore ra e piti. I te pae hopea, aita oia i numera faahou.

Ua imi Allen i te tauturu no to ˈna fifi, area o Tony, ua patoi ïa i te tauturu a to ˈna fetii e hoa haapao maitai. I teie mahana, te faatia nei Allen i to ˈna aamu, o Tony râ ua pohe ïa a tau matahiti aˈenei i roto i te hoê ati pereoo no to ˈna inu-rahi-roa-raa i te ava.

E haafifi atoa te hoê taata e inu hua ra, noa ˈtu e o ˈna anaˈe, i te oraraa o vetahi ê, e pinepine ma te mau faahopearaa peapea. Mai tei matauhia, e tumu te inu-hua-raa i te ava no te riri e te rave-ino-raa, te motoraa e te taparahiraa taata, te ati purumu e ohipa, oia atoa te fifi e rave rahi o te ea. Te aufau nei te totaiete i te hoê tino moni rahi i te mau matahiti atoa no te reira. Aita e faahitihia ra te mauiui i te pae tino e o te mau manaˈo hohonu ta te reira e faatupu i nia i te taata, utuafare, e tamarii.

Noa ˈtura, “e ere te taata o te inu tamau nei i te taero ava,” ia au i te pu Marite o te ea (U.S. National Institutes of Health), “e eita te taero ava atoa e inu i te mau mahana atoa.” Te inu hua noa ra e rave rahi e ere i te taero ava, aita râ ratou e ite ra. Aita vetahi atu e inu pinepine nei, ia inu râ, e pae ïa hapaina e hau atu.

Ia inu oe, ehia hapaina ua rahi roa ˈi? E nafea oe e ite ai afea eiaha ˈi hoê hapaina toe? (Maseli 23:29, 30) E hiˈopoa to muri nei mau tumu parau i te mau haamaramaramaraa faufaa no nia i te reira.

[Nota i raro i te api]