Uiraa a te feia taio

E toru taata paari iho â anei tei haere e hiˈo i te aiû ra o Iesu?

Ia au i te mau aamu Noela no te ao nei, e toru arii, aore ra taata paari, tei hopoi i te taoˈa horoa faufaa na te aiû fanau apî ra o Iesu. Tera iho â anei? Te tuea ra anei te reira e te mau tupuraa mau? E hiˈo mai tatou.

E piti Evanelia, ta Mataio e ta Luka, te faatia ra i te fanauraa o Iesu e i taua taime ra, o te mau tiai mamoe haihai anaˈe no te mau aua tapiri tei haere e hiˈo ia Iesu. E feia hiˈo fetia te mau taata paari, e ere râ i te arii. Aita te Bibilia e parau ra ehia ratou. I to ratou taeraa ˈtu, e ere o Iesu i te hoê aiû fanau apî i roto i te Phatene, e tamarii râ e ora ra i roto i te hoê fare. Ua haafifi atoa te reira i te ora o Iesu!

A hiˈo maitai na i te faatiaraa a te papai Bibilia o Luka i te fanauraa o Iesu. Te na ô ra oia: “E tiai mamoe tei . . . tia i roto i te mau aua, i te tiairaa i ta ratou mau nǎnǎ i te mau araraa i te po. E inaha, ua tia maira te hoê melahi a te Fatu i pihai iho ia ratou, . . . ua parau maira . . . E ite outou i taua tamaiti ra i te vai-noa-raa i roto i ta te puaa vairaa maa, ua vehîhia i te ahu. . . . Haere oioi atura ratou e ite atura ia Maria raua o Iosepha, e i taua tamaiti iti ra i te vai-noa-raa i roto i te Phatene.”—Luka 2:8-16.

I roto i ta Luka faatiaraa, o Iosepha, o Maria, e te mau tiai mamoe anaˈe tei pihai iho i te aiû ra o Iesu.

A hiˈopoa na i teie nei i te faatiaraa a te Mataio 2:1-11: “E ia fanau Iesu i Bete-lehema i Iudea ra, i te hau o te arii ra o Heroda, inaha, e taata paari tei haere mai i Ierusalema mai te hitia o te râ mai . . . E tae atura ratou i roto i te fare, ite atura ratou i taua tamaiti iti ra e tana metua vahine o Maria.”

A tapao e “e taata paari” te faahitihia ra eiaha râ “e toru taata paari,” e ua haere ratou na mua i Ierusalema mai te hitia o te râ mai, eiaha râ i Betelehema, te oire i fanauhia ˈi Iesu. I te pae hopea, i to ratou taeraa ˈtu i Betelehema, e “tamaiti iti” o Iesu i roto i te hoê fare, e ere faahou râ i te aiû i roto i te hoê fare vairaa animara.

I ǒ nei, te faaohipa ra te Bibilia i te parau “taata paari” no teie mau ratere, area te tahi atu mau Bibilia, e “Magoi” ïa aore ra “feia hiˈo fetia.” Ia au i te hoê buka, te huri ra te parau “taata paari” i “te hoê parau Heleni no te mau tahuˈa Peresia ite i te peu hiˈo fetia.” (A Handbook on the Gospel of Matthew) E “taata hiˈohiˈo [ïa], tahuˈa, manamana, e orometua haapii i te tahutahu,” ia au i te hoê titionare.—The Expanded Vine’s Expository Dictionary of New Testament Words.

Noa ˈtu e mea matauhia te peu hiˈo fetia e te tahutahu i teie mahana, te faaara maira te Bibilia eiaha e rave i te reira. (Isaia 47:13-15) Mea faufau roa na te Atua ra o Iehova taua mau peu ra. (Deuteronomi 18:10-12) No reira te melahi a te Atua i ore ai i faaite i te fanauraa o Iesu i te feia hiˈo fetia. Ua faaheitaotohia râ ratou e te Atua eiaha e hoˈi i te arii ino ra o Heroda, no te mea te imi ra oia i te haapohe ia Iesu. Ua “haere atura ratou i to ratou iho fenua na te tahi eˈa ê.”—Mataio 2:11-16.

E hinaaro anei te mau Kerisetiano mau e faatupu noa i te hoê oroa fanauraa tuiroo o te ruri ê ra i te parau mau no nia i te fanauraa o Iesu? Eita iho â ïa.