Mai te aha ‘te maoro o ta ˈu tiaororaa’?

Ua autâ Jayne: “E hinaaro noa vau eiaha e mauiui faahou!” E mariri ai taata to ˈna, tei parare na roto i to ˈna tino taatoa. E hinaaro mau â to ˈna fetii e to ˈna mau hoa ia ora to ˈna maˈi e ia ore to ˈna mauiui pohe! Ua pure ratou i te Atua ia tauturu ia ˈna. E faaroo anei oia? E tâuˈa mai anei?

UA ITE maitai te Atua i te huru o te huitaata. Te na ô ra ta ˈna Parau, te Bibilia: “Te uuru tahi nei te mau mea atoa i hamanihia nei ma te mauiui.” (Roma 8:22) Ua ite te Atua e e hanere mirioni taata, mai ia Jayne, e mauiui nei i te mau mahana atoa i te pae tino, aau, aore ra feruriraa. Te ite ra oia i na 800 mirioni taata o te taoto ma te poia i te mau po atoa, te tahi atu mirioni o te faaruru nei i te haavîraa uˈana i te fare e te metua e rave rahi o te haapeapea ra no te ananahi e te maitai o ta ratou mau tamarii. Ua uiui ê na anei oe e e ohipa mai anei te Atua? No te mea e hinaaro iho â tatou e tauturu i tei herehia, e hinaaro atoa ïa te Atua e tauturu i te huitaata ta ˈna i poiete, e ere anei?

E ere o oe anaˈe tei ui i tera mau uiraa. Hau atu i te 2 600 matahiti aˈenei, hoê â huru to Habakuka, peropheta Hebera haapao maitai, e to e rave rahi i teie mahana. Ua parau oia i te Atua: “Te maoro, e Iehova, o ta ˈu tiaororaa, e aore oe i faaroo mai! te maoro o ta ˈu pii-hua-raa ˈtu ia oe, e hamani ino teie e vai nei, e aita oe i faaora! Eaha ra hoi oe i faaite mai ai i te ino, e ia hiˈo hoi au i te oto ra? te vai nei hoi te haru e te rave aroha ore i mua ia ˈu nei: e te vai nei hoi te feia e faatupu i te mârô e te tamaˈi.” (Habakuka 1:2, 3) Ua ite mata Habakuka i te haavîraa uˈana taehae i to ˈna ra tau. I teie mahana, te haapuroro-noa-hia ra teie mau ohipa e te huru ê nei te mau taata aumihi.

Ua haafaufaa ore anei te Atua i to Habakuka tapitapi? Aita. Ua faaroo oia i ta ˈna mau uiraa haavare ore e ua tamahanahana e faaitoito i teie taata e hepohepo ra. Ua haapuai te Atua ra o Iehova i te faaroo o Habakuka ma te fafau e e faaore Oia i te mauiui. E nehenehe teie poroi a te Atua e tamahanahana ia oe atoa, mai ia Jayne e to ˈna fetii. E pahono to muri nei tumu parau i teie mau uiraa: Eaha te haapapuraa e te tâuˈa maira iho â te Atua? Eaha ta te Atua e rave no te faaore i te mauiui, e afea?