Haapiiraa hape 3: E haere paatoa te feia maitai i nia i te raˈi

Nohea mai teie haapiiraa? I muri aˈe i te poheraa o ta Iesu mau aposetolo, i te omuaraa o te senekele 2, ua rahi mai te mana o te mau Metua matamua o te Ekalesia. Teie ta te hoê buka ite rahi e na ô ra no nia i ta ratou mau haapiiraa: “Te haapiiraa matauhia, oia hoi e horoahia te oaoaraa rahi i nia i te raˈi i te varua tei faarue i te tino i muri noa ˈˈe i te tamâraa titauhia i te poheraa.”—New Catholic Encyclopedia (2003), buka 6, api 687.

Ta te Bibilia e haapii ra: “E ao to tei mǎrû; e riro hoi ia ratou te fenua.”—Mataio 5:5.

Ua fafau Iesu i ta ˈna mau pǐpǐ e e ‘haamaitai oia i te hoê vahi’ no ratou i nia i te raˈi, ua faaite atoa râ oia e eita te feia parau-tia atoa e haere i reira. (Ioane 3:13; 14:2, 3) Aita anei oia i pure e ia haapaohia te hinaaro o te Atua “i te fenua nei mai te i te rai atoa ra”? (Mataio 6:9, 10, V.C.J.S.) Hoê noa râ o na haamaitairaa e piti e tiai i te feia parau-tia. E faatere te hoê tuhaa iti e o Iesu i nia i te raˈi, te rahiraa râ e ora ïa i nia i te fenua nei e a muri noa ˈtu.—Apokalupo 5:10.

I te roaraa o te tau, ua taui te ekalesia matamua i ta ˈna huru hiˈoraa i to ˈna tiaraa i te fenua nei. Eaha te faahopearaa? “Ua mono riirii noa ˈtura te ekalesia haamauhia i te Basileia tiaihia o te Atua,” ta te hoê buka ite rahi ïa (The New Encyclopædia Britannica) i parau. Ua haapuai aˈera te ekalesia i to ˈna mana ma te amui atu i te poritita, ma te tâuˈa ore i ta Iesu i faataa maitai i ta ˈna mau pîpî, “e ere ratou i to teie nei ao.” (Ioane 15:19; 17:14-16; 18:36) I raro aˈe i te mana o te emepera Roma Constantin, ua ofati te ekalesia i vetahi o ta ˈna mau tiaturiraa, te tahi no nia ïa i te huru mau o te Atua.

A hiˈo i teie mau irava: Salamo 37:10, 11, 29; Ioane 17:3; Timoteo 2, 2:11, 12

TUPURAA MAU:

E ora te rahiraa o te feia maitai i nia i te fenua e a muri noa ˈtu—eiaha râ i nia i te raˈi

[Faaiteraa i te fatu o te hohoˈa i te api 6]

Art Resource, NY