Ua ite anei outou?

Eaha to te Atua manaˈo i te peu hiˈo fetia ravehia i rotopu i te mau Iseraela?

Te peu hiˈo fetia, ia au i te hoê titionare, o “te haapiiraa [ïa] i te tereraa o te mau paraneta, te mahana, te avaˈe, e te mau fetia ma te tiaturiraa e e nehenehe teie mau tereraa e ohipa i nia i te oraraa o te taata.” A ohu ai te fenua e ati aˈe te mahana i te mau matahiti atoa, e au ra e e tere atoa te mau pǔpǔ fetia. Mai tahito mai â to te taata hiˈopoaraa i teie mau tauiraa e parauraa e e auraa rahi to te reira.

Ua haamata paha te peu hiˈo fetia e te feia matamua no Babulonia, o tei haamori i te mau fetia e te mau pǔpǔ fetia. Ua rave atura te mau Iseraela i teie huru haamoriraa i to ratou faarueraa i te haamoriraa mau. I te tau o Iosia, arii no Iudea, ua parare rahi te peu hiˈo fetia i reira. Mea maramarama te manaˈo o te Atua i te reira. E senekele na mua ˈtu, i opani na te Ture a Mose i te haamoriraa i te fetia, o te pohe hoi te utua.—Deuteronomi 17:2-5.

A faatitiaifaro ai te arii Iosia i te haamoriraa a to Iudea, i opani atoa na oia i te mau tusia na “te mahana, e te marama, e ia taurua ma, e to te raˈi atoa ra.” Ua rave te arii i teie taahiraa, ia au i te faatiaraa bibilia, no to ˈna hinaaro e “pee . . . ia Iehova e e haapao i ta ˈna parau.” (Te mau arii 2, 23:3-5) E hiˈoraa te reira no te feia atoa i teie mahana e hinaaro ra e haamori i te Atua “ma te varua e te parau mau.”—Ioane 4:24.