A haafatata ˈtu i te Atua
Te hoê Atua tei ineine i te faaore i te hara
‘TE MAITAI ra oe, e te Fatu o Iehova, e ua tia ia oe te faaore mai i te hara.’ (Salamo 86:5) Na roto i teie mau parau tamahanahana, te haapapu maira te Bibilia e e faaore te Atua ra o Iehova i te hara ma te aau horoa. Te faaite maitai ra te hoê ohipa i tupu i roto i te oraraa o te aposetolo Petero e e faaore “rahi” Iehova i te hara.—Isaia 55:7.
E hoa rahi Petero no Iesu. I te po hopea râ o to Iesu oraraa i nia i te fenua, ua mǎtaˈu Petero e ua rave i te hoê hara ino. I roto i te hoê aua i pihai iho i te vahi i haavahia ˈi Iesu ma te tano ore, ua huna Petero ia Iesu i mua i te taata—eiaha hoê noa taime, e toru râ. I muri noa ˈˈe i te toru o to Petero huna-roa-raa, ua “fariu maira [Iesu], hiˈo maira ia Petero.” (Luka 22:55-61) Mai te aha paha te huru o Petero i to Iesu hiˈoraa ia ˈna? I to ˈna taaraa i te ino mau o ta ˈna hara, ua “oto” ihora Petero. (Mareko 14:72) Ua uiui paha te aposetolo tatarahapa e e faaore anei te Atua i ta ˈna hara, to ˈna hunaraa ia Iesu e toru taime.
I muri aˈe i to ˈna tia-faahou-raa, ua paraparau Iesu raua Petero, a ore atu ai te tahi manaˈo feaa e ua faaorehia anei ta Petero hara. Aita Iesu i faahiti i te mau parau etaeta, aita i faautua. Ua ui râ oia ia Petero: “Te [here] na oe ia ˈu?” Ua pahono Petero e: “E te Fatu e, ua ite oe e, te [here] atu nei au ia oe.” Ua na ô atu Iesu e: “A faaamu i tau mau arenio.” Ua tapiti Iesu i te uiraa, e ua horoa Petero i tauâ pahonoraa ra, ma te papu atu â paha. Ua na ô atu Iesu e: “A tiai i tau mau mamoe.” Ua ui Iesu i terâ uiraa tumu no te toru o te taime: “Te [here] na oe ia ˈu?” “Ua oto ihora Petero” e ua parau e: “E te Fatu, aore roa e mea toe i te itea ia oe, ua ite oe e, te [here] atu nei au ia oe.” Ua pahono Iesu e: “A faaamu i tau mau mamoe.”—Ioane 21:15-17; MN.
No te aha Iesu i ui ai i te mau uiraa ua ite ê na o ˈna i te pahonoraa? E nehenehe ta Iesu e ite eaha to roto i te aau, ua ite ïa oia e mea here na Petero ia ˈna. (Mareko 2:8) Ma te ui i tera mau uiraa, ua horoa Iesu ia Petero i te ravea no te haapapu i to ˈna here e toru taime. Ua haapapu ta Iesu pahonoraa: “A faaamu i tau mau arenio. . . . A tiai i tau mau mamoe. . . . A faaamu i tau mau mamoe,” i te aposetolo tatarahapa e te tiaturi-noa-hia ra oia. Inaha, ua faaue Iesu ia Petero e aupuru i ta ˈna mau pǐpǐ here e au i te mamoe, faufaa roa hoi. (Ioane 10:14, 15) Eaha paha te topa te hau o Petero i to ˈna iteraa e te tiaturi noa ra Iesu ia ˈna!
Mea papu e ua faaore Iesu i te hara a ta ˈna aposetolo tatarahapa. I te mea e te faaite ra Iesu ma te tia roa i te mau huru maitatai e te mau eˈa o to ˈna Metua, e nehenehe noa ïa tatou e faaoti e ua faaore Iehova atoa i ta Petero hara. (Ioane 5:19) E ere Iehova i te Atua hinaaro ore i te faaore i te hara, e Atua aroha hamani maitai râ ‘ua tia ia ˈna te faaore i te hara’ a te hoê taata hara tatarahapa. E manaˈo mahanahana teie, e ere anei?