Te imiraa i te mau pahonoraa

“Ua itehia te pahonoraa o te uiraa ‘e nafea’ ia imi i te moni, ua haaatihia tatou iho e te oraraa fanaˈo aita i manaˈohia i mutaa iho—mai te faatoetoeraa mataˈi, te taˈiraa maitai roa o te upaupa, e te maa hotu i te roaraa o te matahiti—e haaferuri te reira ia tatou ‘no te aha’ tatou e ora ˈi. No te aha teie hororaa tataˈu rohirohi? Eaha te tumu?”—David Myers, orometua haapii i te tuhaa no nia i te feruriraa i te Hope College, Holland, Michigan, Marite

E NAFEA oe e pahono ai i teie mau uiraa i tuuhia mai e teie orometua haapii? E uiui paha te tahi mau taata e mea hoona anei ia horoa i te taime no te imi i te mau pahonoraa. Teie râ, e au te tamataraa i te tâuˈa ore i teie mau uiraa i te tamataraa i te tâuˈa ore i te ofai nainai i roto i to oe tiaa—e nehenehe oe e tamau i te haere teie râ e ere to oe haereraa i te mea oaoa.

Mai te peu e ua uiui ê na oe e e auraa anei to te oraraa, e ere o oe anaˈe. Ia au i te hoê titorotororaa no nia i te mau mea faufaa i te ao nei, te hoê o te mau hiˈopoaraa rahi roa ˈˈe i te mau mea faufaa a te taata i arataihia aˈenei, te rahi noa ˈtura te taata i te fenua e rave rahi te feruri nei i te “auraa e te tumu o te oraraa.”

Mai te peu e e hinaaro oe e fanaˈo i te hau mau o te feruriraa, e mea tia ia ite oe i te pahonoraa o teie nau uiraa faufaa e toru.

Nohea mai tatou?

Eaha te tumu o te oraraa?

Eaha ta to a muri aˈe e hopoi mai?

Ihea oe e nehenehe ai e ite i te mau pahonoraa mau o teie mau uiraa faufaa? E horoa te mau api i muri nei i te mau pahonoraa e vai ra i roto i te Parau a te Atua, te Bibilia, aita râ e pûpû ra i te mau manaˈo feruri-noa-hia aore ra philosophia. Te titau manihini nei matou ia oe ia iriti i ta oe iho Bibilia e na oe iho e hiˈo eaha ta te reira e parau ra.