Te fifi ia haehaa

MEA rahi te taata e manaˈo nei e aita e haehaa i roto i te ao i teie mahana. Te feia o te faatere nei ia vetahi ê e o te manuïa roa nei ia hiˈohia, o te feia faaoru ïa o te tutava roa nei i te na nia ˈˈe ia vetahi ê e i te onoono ia noaa mai ta ratou e hinaaro. Te nounou nei te rahiraa o te taata i te huru oraraa o te feia ona e te tuiroo, eiaha te feia haehaa e te mǎrû. Mea au na te taata e faatietie e maoti ratou iho i manuïa ˈi ratou. Eita ratou e haehaa, e parau râ ma te faaoru e na ratou iho ta ratou manuïaraa.

Ua faahiti te hoê taata maimi no Kanada i te “faraa mai o te huru ‘o vau na mua’” i to ˈna fenua. Te manaˈo nei te tahi atu e te ora nei tatou i roto i te hoê totaiete e mea faufaa aˈe te faaoaoaraa ia ˈna iho i te amoraa i te hopoia e te ite nei ratou e te haapao roa nei te taata ia ratou iho i teie tau. I roto i te hoê ao mai tera, e ere paha te haehaa i te hoê huru maitai auhia.

Parau mau, mea iti o te patoi i te manaˈo e e huru maitai roa te haehaa no vetahi ê, i te mea e mea ohie ia tapiri atu i te feia haehaa. I roto râ i to tatou ao o te tataˈuraa, te taiâ nei vetahi ia hiˈo vera ma ia ratou ei feia paruparu no te haaraa ma te haehaa.

Ua faaite atea te Parau a te Atua, te Bibilia, e e riro te taata ei mea ‘faaahaaha e te teoteo’ i to tatou tau. (Timoteo 2, 3:1, 2) Eita anei oe e farii e te tupu nei teie parau tohu? I to oe manaˈo, mea faufaa anei ia haehaa? Aore ra te manaˈo ra anei oe e mea paruparu te hoê taata haehaa, ohie i te faateretere atu?

Te horoa ra te Bibilia i te mau tumu papu e haafaufaa ˈi e e atuatu ai i te haehaa. Te horoa mai ra te reira i te hoê manaˈo maitai e te faito noa no nia i tera huru maitai e te faaite maira e e tapao te haehaa mau no te puai, eiaha no te paruparu. Na to muri nei tumu parau e faataa no te aha.

[Hohoˈa i te api 3]

Eaha to tatou huru aau no ta tatou mau haaraa?