Te papairaa to ˈna faufaaraa i Iseraela i tahito ra

UA TAIO ê na anei oe i te tahi tuhaa o te Iliade aore ra te Odyssée, na pehepehe tuiroo e piti o Heleni tahito? Te manaˈohia ra e ua papaihia te reira i te 9raa aore ra te 8raa o te senekele H.T.T. E nafea tera mau papai e faaauhia ˈi e te Bibilia, tei haamatahia i te papai e rave rahi senekele na mua ˈtu? Te faaite ra te buka The Jewish Bible and the Christian Bible: “E 429 aˈe faahitiraa i te papairaa e i te mau parau papaihia to te Bibilia. Mea rahi tera mai te peu e e haamanaˈo te taata e hoê noa faahitiraa i te papairaa to te Iliade e aita to te Odyssée.”

Te faataa ra te buka ite rahi The Oxford Encyclopedia of Archaeology in the Near East e “i Iseraela i tahito ra e au ra e e tuhaa taatoa te papairaa no te haapaoraa.” Ei hiˈoraa, ua haapapaihia te faufaa o te Ture e i muri aˈe ua taio-tamau-hia i te huiraatira i mua i te mau tane, te mau vahine e te mau tamarii atoa. Ua taio-atoa-hia e ua haapiihia e te taata ei pǔpǔ aore ra hoê anaˈe. I muri aˈe i te hiˈopoaraa i te tahi mau tuhaa o te Ture, te faaoti ra o Alan Millard, orometua haapii rahi i te fare haapiiraa tuatoru o Liverpool, e: “Te manaˈohia ra e e ohipa te taioraa e te papairaa i nia i te oraraa o te mau huru taata atoa.”—Deuteronomi 31:9-13; Iosua 1:8; Nehemia 8:13-15; Salamo 1:2.

Te faataa ra te aposetolo Paulo e nafea te mau Kerisetiano ia hiˈo i te mau papai moˈa e tia ˈi: “Te mau parau atoa . . . i papaihia i mutaa ihora, i papaihia ïa ia ite tatou; ia noaa to tatou tiairaa, i te faaoromai e te mahanahana o te parau i papaihia ra.” Te haafaufaa ra anei oe iho i te Bibilia ma te taio tamau i te reira?—Roma 15:4.