Te tahi ruhiruhia hanere matahiti e fa ta ˈna i roto i te oraraa

O ELIN te hoê o na taata e 60 i Tuete i tapurahia aˈenei 105 matahiti te paari aore ra hau atu. To ˈna matahiti, 105 ïa. Noa ˈtu e tei roto oia i te hoê fare aupururaa i te feia ruhiruhia, aita to ˈna ea e haafifi ra ia ˈna ia tamau i te tavini ei Ite no Iehova itoito, te oraraa ta ˈna i maiti a 60 tiahapa matahiti aˈenei.

Ia poro oia ia vetahi ê, e pee Elin i te hiˈoraa i vaiihohia mai e te aposetolo Paulo a vai ai oia i roto i te fare tapearaa, i roto i te hoê fare. Ua poro Paulo i te feia atoa i haere atu ia ˈna ra. (Ohipa 28:16, 30, 31) Oia atoa, i te mau taime maitatai atoa, e paraparau o Elin i te feia e tamâ i te fare, te mau taote niho, te mau taote, te feia tâpû rouru, te mau tuati, e i te tahi atu â ta ˈna e farerei i roto i te fare, ma te faaite ia ratou i te parau apî maitai i roto i te Bibilia. I te tahi taime, e titau manihini atoa te mau hoa Kerisetiano o ta Elin amuiraa i ta ratou mau piahi Bibilia ia haere e farerei ia ˈna ia nehenehe ratou e faufaahia i to ˈna ite e to ˈna aamu.

E faahiahia te mau melo o ta Elin amuiraa i to ˈna huru oaoa e te anoenoe. Te parau ra te hoê hoa Ite e: “E aravihi maere mau to ˈna i te iteraa i te mau ohipa a te amuiraa. E haamanaˈo oia i te mau iˈoa o te mau tamarii atoa e o te feia i tae apî mai i roto i te amuiraa.” E mea matau-atoa-hia o Elin no to ˈna farii maitai, to ˈna huru hoata, e ta ˈna huru hiˈoraa maitai i te oraraa.

Na te aha e tauturu ra ia Elin ia atuatu i to ˈna oaoa e ia tiatonu noa i ta ˈna fa i roto i te oraraa? E taio oia i te hoê irava o te mau Papai i te mau mahana atoa i roto i te buka iti E hiˈopoa anaˈe i te mau Papai i te mau mahana atoa, neneihia e te mau Ite no Iehova. Maoti te hoê mata faarahi, e taio atoa oia i te hoê tuhaa o te Bibilia i te mahana taitahi. E faaineine o Elin i te mau putuputuraa tahebedoma a te mau Ite no Iehova, e noa ˈtu e eita oia e nehenehe e amui tino atu, e faaroo oia i te mau haruharuraa o taua mau putuputuraa ra. Na roto i te taio-tamau-raa i te Bibilia e te mau papai bibilia e te faarue-ore-raa i te mau putuputuraa Kerisetiano, e nehenehe tatou e ora i te hoê oraraa fanaˈo e e auraa to te reira noa ˈtu eaha te faito o to tatou matahiti.—Salamo 1:2; Hebera 10:24, 25.