Te tane e te vahine—hamanihia no te apiti te tahi i te tahi
UA HINAARO noa iho â te tane e te vahine e apiti te tahi i te tahi. No ǒ mai taua hinaaro ra i te Atua ra. Ua ite Iehova e e ere i te mea maitai ia parahi noa te tane matamua ra o Adamu o ˈna anaˈe. Ua hamani atura te Atua i “te tahi tauturu au na [te tane] ra.”
Ua haamairi Iehova i te varea taoto rahi i nia ia Adamu, e ua rave ihora oia i te hoê aoao no ˈna e “e taua aoao . . . hamani ihora oia ei vahine; e ua aratai maira oia ia ˈna ia Adamu ra.” Ua oaoa roa Adamu i te iteraa ˈtu i teie poieteraa haviti a Iehova e ua na ô e: “I teie nei, e ivi teie no to ˈu nei ivi, e iˈo hoi no to ˈu nei iˈo.” Ma to ˈna mau huru vahine maitatai, mea maitai mau â te vahine tia roa ra o Eva. E no to ˈna tura, e au i te tane tia roa o Adamu te faatura. Ua hamanihia raua no te apiti te tahi i te tahi. Te na ô ra te Bibilia e: “No reira e faarue ai te taata i tana metua tane e tana metua vahine, a ati atu ai i ta ˈna vahine, e e riro hoi raua ei hoê.”—Genese 2:18-24.
I teie râ mahana, te amahamaha nei te mau utuafare, e mea pinepine mea haavî aore ra mea miimii te taairaa i rotopu i te tane e te vahine. No te huru feruriraa tataˈu i rotopu i te tane e te vahine, e tupu te mârôraa e te peapea. Aita tera mau mea atoa e tuati ra i te opuaraa a te Atua no te tane e te vahine. Ua hamanihia te tane no te rave i te hoê ohipa faahiahia i nia i te fenua. Ua titauhia ia haapao te vahine i te hoê parahiraa otahi e te faahiahia i pihai iho i te tane. Ia haa amui raua ma te au maite. Mai te omuaraa mai â o te oraraa o te taata, ua tutava maite te mau tane e vahine paieti i te rave i te mau tuhaa ta Iehova i opua no ratou, e ua ite atu â ratou i te oaoa e te mauruuru.
E tupu te hau e te au-maite-raa ia rave te mau tane e te mau vahine i ta ratou tuhaa no ǒ mai i te Atua ra. E ite ïa ratou i te mauruuru e te oaoa. Hau atu â, na roto i te haapaoraa i te mau titauraa bibilia, e fanaˈo ratou taitahi i te tura e te hoê parahiraa faahiahia i roto i te faanahoraa a te Atua.
[Hohoˈa i te api 3]
Ua hamanihia te tane e te vahine no te rave i te mau tuhaa tura i roto i te faanahoraa a te Atua