Noela—Te haere atu ra ïa ihea?

HOÊ ahuru matahiti aˈenei i teie avaˈe, ua vauvau te vea ra U.S.News & World Report i te api matamua i te tumu parau ra “I te imiraa ia Noela.” Ua haamatara te tumu parau e ua riro mai anei Noela ei “mea vii ore roa, ei mea tapihoo ore aˈe.” Tera iho â anei?

Ua haamaramarama te tumu parau i te mau tumu eiaha ˈi tatou e tiaturi i te reira. Teie tei parauhia: “Aita e papai e faaite ra i te haapaoraa haamanahia o te fanauraa o te Mesia e tae roa ˈtu i te maharaa o te senekele, i to Constantin . . . faatereraa ei emepera o Roma.” Ua faaite te reira e “i roto i te tahi faito, aita e taata i ite papu inafea to Iesu fanauraahia.” Ua farii te tumu parau e “ua mamû te mau evanelia i nia i te matahiti, te avaˈe aore ra te mahana tia atoa.” Ia au i te hoê vahine tuatapapa o te haapiiraa teitei i Texas, “aita te mau Kerisetiano matamua roa ˈˈe i anaanatae noa i te faatupuraa i te Nativité.”

I raro aˈe i te upoo parau iti “Tumu aimârôraa,” ua hiˈopoa te tumu parau “mea nafea te ekalesia i te maitiraa i te 25 no Titema.” Ua na ôhia e: “Te manaˈo i farii-rahi-roa ˈˈe-hia, oia ïa ua riro te oroa ei ‘faakerisetianoraa’ opuahia i te mau Saturnales e te tahi atu mau oroa etene.” “Ma te tuu atu ia Noela i te hopea o te Titema, i te taime i matau aˈena ˈi te taata i te faatupu i te oroa, ua rave te mau aratai haapaoraa e ia parare te faatupuraa i te fanauraa o te Faaora.” I te afaraa o te senekele 19, ua tuuhia te tapao i nia i te hooraa mai e te horoaraa taoˈa. “Ua faatupu te peu tutuu apî o te horoaraa taoˈa i Noela i te imiraa moni, e aita i maoro, ua haamata te mau taata hoohoo e te feia faatianiani i te paturu i te tau oroa.”

Aita ïa e tumu no te tiaturi e te haere atu ra Noela i te tahi atu vahi, te atea ê atu ra râ i te Kerisetianoraa viivii ore. Noa ˈtu e mea rahi “te tapihooraa faaahaaha” i Noela no teie tau, aita roa ˈtu iho â te mau Kerisetiano mau i hinaaro i te faatupu i te fanauraa o Iesu. Area râ, te haamahitihiti ra te Bibilia i te hoo ta te Mesia i pûpû na roto i to ˈna poheraa e to ˈna tia-faahou-raa no te haere i nia i te raˈi. (Mataio 20:28) Mea faufaa noâ te reira e i te tau a muri aˈe atoa.