E nehenehe anei te hoê haava e aˈohia?

UA TAPURAHIA o Sladjana, te hoê Ite no Iehova i Croatie, no te tia ˈtu i mua i te tiripuna no te tahi mau ohipa i te pae moni. Ua tae atu oia i te hora tia i mua i te hoê haava. Ua taere râ te tahi atu pae. Ua hinaaro roa o Sladjana e horoa i te hoê faaiteraa a tiai noa ˈi te taata atoa, ua faaitoito oia i te paraparau i te haava.

“E te haava e, ua ite anei oe e fatata roa aita e haava e feia toroa faahou i te fenua nei?” ta ˈna ïa i ui. Te faahiti ra iho â oia i te mau haava mai ta tatou i ite i teie mahana.

Ma te maere, ua hiˈo noa te haava ia ˈna, ma te ore e taa eaha te parau atu. Ua haamata aˈera te haavaraa i reira iho. I to ratou faaotiraa e to Sladjana tiaraa no te tuu rima i te hoê parau, ua piˈo te haava e ua ui mǎrû atura ia ˈna: “Ua papu anei ia oe i ta oe i parau mai e fatata roa aita e haava e feia toroa faahou i te fenua nei?”

“E, e te haava e. Ua papu roa ia ˈu!” ta Sladjana ïa i pahono.

“E haapapuraa anei ta oe?” ta te haava ïa i ui atu.

“E itehia te reira i roto i te Bibilia,” ta Sladjana ïa i pahono.

Ua parau te haava e e hinaaro oia e taio i tera haapapuraa, aita râ ta ˈna e Bibilia. Ua pûpû atura Sladjana i te hoê na ˈna. Ua farerei te mau Ite i te haava, ua horoa ˈtu i te hoê Bibilia, e ua faaitoito ia ˈna ia fanaˈo i te hoê hapiiraa bibilia tahebedoma. Ua farii te haava i te pûpûraa e aita i maoro, riro mai nei oia ei Ite no Iehova.

Te na ô ra te Salamo 2:10 na roto i te parau tohu e: “E te hui arii ra, ia paari outou; e farii i te aˈo, e te mau haava o te fenua nei.” Auê te aau i te mahanahana ia farii tera mau taata haehaa i te aratairaa î i te here a Iehova e!

[Hohoˈa i te api 32]

Sladjana e te haava