Ia itea te aveia na te hoê moana aano

TE VAI ra 1 200 tiahapa motu e motu iti to te mau Motu Marshall, aita te rahiraa i hau atu i te 6 metera i te teitei i nia ˈˈe i te faito miti. Eita ratou e itehia ia hiˈohia na te atea rii noa na tai mai. Tera râ, ua nehenehe te mau ihitai tahito no Marshall i roto i to ratou mau vaa e fano atu i tera motu iti i tera motu iti, ma te ite i to ratou aveia i roto e 650 000 kilometera tuea o te moana Patitifa. Ua nafea ratou? Ua arataihia ratou maoti te faaohiparaa i te tahi mau “hohoˈa fenua” ohie, mea manuïa roa râ, parauhia te mau “tapura moana papaa iti.”

Na roto i ta ratou i ite ê na, ua haapii te mau ihitai no Marshall e e faatupu te vairaa o te fenua i te tahi hohoˈa are o te faaite i te vahi o te hoê motu i te atearaa fatata e 30 kilometera. E rave rahi hohoˈa are te haapii mai, e ua riro te mau tapura moana papaa iti ei ravea no te haamanaˈoraa. Mai te aha na te mau tapura moana papaa iti? Mai ta outou e ite ra i nia i te hohoˈa, e haunehia te mau papaa iti hamanihia i te puvaavaa aˈa o te fara aore ra i te niau i taraihia ma te faahohoˈa i te mau are. E taamuamuhia te mau pupu nainai i nia iho no te tapao i te vahi au o te mau motu.

E rave rahi matahiti i te maoro, ua riro te tereraa na te moana ma te faaohipa i te tapura moana papaa iti ei parau huna, ua faaite-noa-hia i te tahi mau taata i maitihia. E nafea ïa te hoê ihitai apî e haapii ai i te faaohipa i te hoê tapura moana papaa iti? Mea na roto noa ïa i te faaineineraa e te faaohiparaa. Na te hoê ihitai aravihi e haapii i te hoê ihitai apî o raua anaˈe, ma te afai paha ia ˈna i roto i te mau tere i te mau motu tapiri. A haapii ai te piahi i te ite i te mau hohoˈa are, e tiaturi roa ˈtu â oia i ta ˈna tapura moana papaa iti. I te pae hopea, e nehenehe o ˈna iho e tere na te moana.

Hoê â huru no te Parau a te Atua, te Bibilia, e nehenehe te reira e faaohipahia ei aratai no tatou i roto i te tere o te oraraa. Na mua, e tauturu paha te hoê taata ia tatou ia taa i te mau mea faufaa roa o te mau Papai. I muri iho, a tamau ai tatou i te haapii i te Parau a te Atua e i te faaohipa i to ˈna mau faaueraa tumu, e tiaturi roa ˈtu â tatou i ta ˈna e parau ra. Ua parauhia ia Iosua te aratai o te mau Iseraela ia taio noa i te Parau a te Atua ia nehenehe oia “ia haapao hua . . . i tei papai-atoa-hia i roto ra.” “Ei reira,” ua parau atu te Atua ia Iosua, “e maitai ai to oe haerea, ei reira oe e manuïa roa ˈi.” (Iosua 1:8) Oia, e nehenehe te Bibilia e faanaho no tatou i te hoê tere papu e te manuïa i roto i te oraraa.

[Faaiteraa i te fatu o te hohoˈa i te api 32]

© Greg Vaughn