Aˈuaˈuhia na mua ˈˈe, tauahihia i muri iho

A TAU matahiti aˈenei, ua reva o Santiago e ta ˈna vahine o Lourdes i te oire nehenehe ra o Huillcapata, i Peru, no te poro i te poroi bibilia o te tiaturiraa i te mau taata i reira. Aita râ i maoro, ua tae mai te hoê perepitero mai Cuzco mai e ua haaputuputu i te feia e faaea ra i reira. Ua faaara te perepitero ia ratou e e hopoi mai te vairaa mai o te mau Ite no Iehova i te ati pohe e te toparaa hiona rahi o te haapohe i ta ratou mau puaatoro e o te faaino i ta ratou mau faaapu.

Mea rahi tei vare i teie “parau tohu,” e hau atu i te afa matahiti, aita hoê aˈe i farii i te titau-manihini-raa a Santiago e a Lourdes e haapii i te Bibilia. Ua aˈuaˈu te hoê faatere o te oire o Miguel te iˈoa, te raatira mutoi a te hau, ia Santiago e ia Lourdes na roto i te aroâ ma te taora ˈtu i te ofai. Tera râ, ua faaea hau noa raua, te haerea Kerisetiano.

I muri aˈe, ua farii te tahi mau taata o te oire i te hoê haapiiraa bibilia. Ua taui atoa o Miguel i to ˈna huru. Ua haamata o ˈna i te haapii na muri ia Santiago, ua faaea i te inu hua i te ava, e ua riro ei taata hau. Ua farii atura o Miguel, ta ˈna vahine, e e piti o ta ˈna mau tamahine i te parau mau bibilia.

I teie mahana, te vai ra te hoê amuiraa ruperupe a te mau Ite no Iehova i teie oire. Ua oaoa o Miguel i te mea e aita te rahiraa o te ofai ta ˈna i taora i tano i nia ia Santiago e ia Lourdes, e ua mauruuru o ˈna i na hoa faaipoipo no to raua hiˈoraa maitai roa o te hau.

[Hohoˈa i te api 32]

Na te huru hau o Santiago e o Lourdes (i nia) i turai ia Miguel (i te pae atau roa) ia taui i te huru aau