E tufa ratou i te parau apî maitai na te feia tariˈa turi

“TE AFAI maira ratou i te mau mea pae varua na outou!” Mea na reira to te taata faatere o te hoê fare no te mau ruhiruhia no Navalcarnero, i Madrid, i te fenua Paniora, faataaraa aita i maoro aˈenei i te mau tere o te mau Ite no Iehova i ta ˈna pu. Eaha tei turai ia ˈna ia parau i te reira?

E tariˈa turi te rahiraa o te feia e faaea ra i te pu o Rosas del Camino. Teie râ, i te mea e ua tutava te mau Ite i te haapii i te reo aparaa rima Paniora, e nehenehe ratou e tauaparau e tera feia e faaea ra i reira. Ua arue te taata faatere i te mau Ite no to ratou pûpûraa ma te tamoni ore i to ratou taime no te haapii i te mau faufaa pae varua i te feia e hiaai ra i te reira. Ua ite oia i te ohipa maitai a te haapiiraa o te parau apî maitai o te Basileia i nia i te feia no reira. E ua haafaufaa rahi atoa te feia no reira—te feia iho â râ eita e faaroo aore ra e ite—i te mau tere o te mau Ite.

Te haapii ra o Eulogio, te hoê matapo e tariˈa turi no reira, i te Bibilia e te mau Ite no Iehova i teie nei. I te hoê mahana a tupu ai te haapiiraa, ua haafatata ˈtu te hoê taata ruhiruhia e ua pûpû na te Ite i te hoê pehepehe ta te feia e faaea ra i reira i fatu ei faaiteraa i to ratou mauruuru. “Ei Ite,” te upoo parau ïa o taua pehepehe ra. Te parauhia ra, i roto i te tahi tuhaa, e: “Te ora ra ratou i te hoê oraraa mauruuru e te naho maitai, e te fanaˈo ra ratou i te paari oaoa no ǒ mai ia Iehova ra. Te haere pinepine nei ratou na te mau fare no te mea te tiaturi ra ratou ia Iehova.”

Na teie hoi tiaturi ia Iehova i turai e rave rahi Ite e ati aˈe te ao nei ia haapii i te reo aparaa rima o te feia tariˈa turi i roto i to ratou fenua. Mea na reira ratou e tufa ˈi na taua feia ra i te poroi faaitoito o te tiaturiraa e itehia ra i roto i te Bibilia.